2017 Q4 nung Smartphone Revenues tesadang Apple meyong asü

Tsüklai 17, 2018 (Agencies): 2017 quarter pezübuba nung global smartphone revenues tesadang dak tema Apple pur keti ao. Parnok revenue share shilem 51 liasü, ta osang ka ajanga metetdaktsü.
Market research firm Strategy Analytics, ajanga ashiba agi, 2017 quarter pezübuba nung alima ajunga nung wholesale revenues shilem 8 agi renloka sen USD billion 120 ajung, koba tang tashi nung timtiba lir.
“Smartphone industry wholesale average selling price 2016 küm pezübuba quarter nung $255 aliba nungi shilem 18 ajungketa 2017 quarter pezübuba nung $300 jungogo,” ta Strategy Analytics director Linda Sui-i ashi.
Sui-isa ashiba agi, South Korean tech company tetsüti Samsung pur shishilembaba shilem 16 agi timba küma, 2017 pezübuba quarter nung USD billion 19 ajung.
Apple aser Samsung smartphone naprongla wholesale average selling price (ASP) kanga tashi ita renlokogo aser 2017 pezübuba quarter nung shilem 21 renloka USD 254 aazük.
“Note 8 aser Galaxy S8 models kanga nüngtugu akümba aser iba dang nungi tajemba jenjang nung ayokba phone tem kar China amala Asian market nung kanga junga ayokba ajanga parnok nem terenlok bener arutsü,” ta Sui-isa ashi.
Apple puri taküm iPhones tasen asem sayatsü asoshi renemshidar aser item phone asem rongnung ka nüngtuguba asütsü, ta Taiwanese business group KGI Securities den külemi inyaker top analyst kati ashi.