2017 United Kingdong General election Brehostibarnü agi

London, June 08 (Agencies): 2017 United Kingdom (UK) indang general election polling station 40,000 dak tali nung agiogo.
Brehostibarnü 07:00 (BST) ako nungi vote agütsü tenzük aser 22:00 (BST) ako nung tembangba sülen item vote ya azüng tenzüktsü. Iba election nung Westminster MP 650 shimtsü aser UK nung vote agütsütsü nisung million 46.9 lir. 2015 UK general election nung vote agütsür million 46.4 liasü.
‘Postal voting’ ajanga nisung kar bo vote agütsüogo aser 2015 general election nung vote agütsür shilem 16.4 bo ‘postal’ ajanga vote agütsü. Nüburtem shirnoki pei vote post ajanga yokbatem election ketdangser ket metongteti ali, parnoki iba vote tem ya local polling station nung oa agütsütettsü, ta ketdangser osang ajanga ashi.
Seat 650 nungi 2015 küm Conservative teloki seat 331 nguteta takok anguba mapang UK nung vote agütsür shilem 66.4 liasü.
Polling station ya timba ka school, community centre aser parish hall amala tesemtem nung lir, saka taoba mapang general election nung bo pubs, launderette aser school bus tem nunga vote agütsüdaktsü.
Tawa kiralongrar temi lendong agütsüba sülen polling station nung police timba kümogo aser yimti yimdong nung yamaji police temi tanükba agütsür.
Iba election nung takok angur tenüng kar bo taonung ayatirm nung sangdongtsü imlar aser tatembang osang bo Hokulbar nikongdang tashi nung metetdaktsütsü, ta ketdangser kar-i ashi.
House of Commons nung seat 326 anguba telok ajanga UK nung sorkar tentettsü.
Vote agütsüba ya 22:00 BST ako nung shibangtsü saka polling station nung vote agütsütsü nokdaka lira parnok nem mapang süyiaka vode agütsüdaktsütsü, ta ketdangsertemi ashi.
2017 UK general election nung tokteper telok tulutiba ana ya UK Ato Kelonser, Theresa May-i aniba Conservative Party aser Jeremy Corbyn-i aniba Labour Party ya lir.
UK Ato Kelonser, Theresa May-i April 18 nung UK General Election ya June 8 nung agitsü lemtetba ajanga alima nung aliba aser talisa UK nung aliba nüburtem kanga aoksatepa liasü. UK nung general election ya 2020 nung agitsü liasü, saka House of Commons nung sorkar tentetba telok ya nübu ajema aliba ajanga Brexit nung junga shilem magiteter, ta Theresa May-i shia general election ya agishitsü lemtet.