2018 election nung BJP power-i arutsü merangtsü: Visasolie Lhoungu

Mokokchung, May 10 (TYO): Terenlok maparen sademsadema inyaktsü asoshi taruba 2018 election nungbo BJP-i menden teimba nguteta yimsü asütsü merangtsü, ta Nagaland BJP tir Visasolie Lhoungu-i metetdaktsü.
Pai iba o ya Mongulbarnü Bharatiya Janata Party (BJP) pur lokti senden ka yangi Cosmos Hall Mokokchung nung alidang metetdaktsü. Iba lokti senden ya “ajak den külemi, ajak atema terenlok” omen nung ajemdaker ayongzüka liasü.
Tir, Visasolie-isa ashiba agi, BJP ya aikati Hindu tamanger telok ta jembiba ya olulu dang, iba o ya political party kari pei telok ajangzüktsü atema jembiba dang lir. BJP telok ya India linük temzüngi melaba ama nükjidong akaba national aser political party tejangja ka lir, ta jangjashitsü. “BJP-i Christian-tem anemer ta jembir saka ibaji tiazü o lir”, ta paisa shisem.
Christian teimba aliba state nung sentongtemji iba yimya nung sarasademer tenzüker, Muslim nunger teimba aliba state nunga yamaji par yimsü dak apet sentongtemji achayanga inyaker, yamaji BJP-i tamangba yimsü ajak dang akhümtsübua benshir, ta paisa kuli kar densema ashi.
Paisa RSS pur dak tajung aliba kar lemsatepdang, India nung RSS-i lapokba reju tajung aika lir, yangji Christian-tema aika züngdaki aser education tajung angur. Parnoki (RSS-i) inyakba mapatemji tesüngmangtsü aser jangratemtsü aika lir, parnok dak tazüokba, temeim aser telungjem lir. Aji oda, “parnok dang nungi tangazüktsü aika lir”, ta ashi.
Political party-tem aikati terenlok mapatongtemji azüklen nungi tenzüka inyaker, saka BJP dak tajung kaji- ‘terenlokji yimtak yimtsüng (grass root) nungi dang maparen ajak tenzükyonga inyaker’, ta paisa ashi.
Paisa Naga yimten dak sentakba kar ashidang, BJP-i aniba NDA sorkar kübok mapang taoba Indian Ato Kilonser Atal Bihari Vajpayee lenisüba nung “Naga nunger otsü ya tangar dang nungi khenyongi balaka” ta agizüka ayu.
Yamaji tanü Narendra Modi mapang nunga “Peace Accord Agreement” yangluogo. Aji oda, BJP-i Naga yimten asoshi inyakba kuli aika lir, ta metetdaktsü. “Anungji, Naga nungeri BJP-ji yaritsüla aser nungittsü tim”, ta paisa ayongzük.
“Mokokchung district ya kechisarena nung samanir lir, anungji, nenoki anir yimten yimsüsüba tsütsü temelenshi ka tenzüktsüla”, ta paisa BJP telok pusemtsü asoshi tayongzükba ka agütsü.
“Tanü Nagaland nung BJP telok tera dang alitsü akok, saka asenoki dang lungjemer meranga inyakra kenübo alizüng tongtettsü”, ta paisa ashi.
Paisa osang tajung ka lemsatepdang, Longpayimsen NPF unit pur ajak pei menden toktsür BJP telok nung adentsü telemtetba agiba asoshi pelaba den BJP kibong nung pelashishia aniokba metetdaktsü.
Pre-poll Alliance ka ama DAN sorkar nung dena arudagi, aji saka, BJP-i abenba mapatong aika sorkari mataloktsü lir, anungji, terenlok maparen sademsadema inyaktsü asoshi taruba 2018 election nungbo BJP-i menden teimba nguteta yimsü asütsü merangtsü, ta Nagaland BJP tirisa metetdaktsü.
Kasa sentong nung “NDA sentong aser takok angubatem” onük nung Finance & Development BJP Nagaland, convener H.K Khulu-i jembi aser “BJP 2018 nükla” onük nung Nagaland BJP vice president K James Vizo-i jembia liasü. “Naga yimten tebilemtsü” onük nung ajemdaker Dr. M Chuba Aoi jembitsüba liasü saka pa marutet.
Sentong nung National executive member (Mahila) Rosi Yanthan, Vice President Nagaland aser Mokokchung incharge Tsasepi Sangtam, Mokokchung District BJP tir L Temsü Jamir, Kisan Morcha (BJP Mkg Dist.) tir Imlisongla nungertemia mapang tatsütsü agia shilem agi.