2018 KÜM TOM TASHI NUNG ONÜK KAR BILEMTETER

– Talitemjen Imchen

Tamasa, olemsapang zülur aikati onük (heading) kanga sashia amshir. Akok nungbo heading ya tera mesashiba yur ocet ya zülu tajungba. Kechiaser heading nungji masü ocet nungji tazünger-i züngteter. Tazünger-i ocet aika nung metongsemi aliba züngteter aser ocet kar nungbo 50/50 süa züngteter. Ocet karbo ajak-i meteta aliba tashi tezülur-i madoksa-i züluteter. Tazünger karbo heading dang ngur temolung yiruadokbapurtema lir. Item jia külem adianu aser Christianpurtem lir.
Langpangkong Kaketshir Mongdang-i CLEAN ELECTION nung noktaktsü pangzüng küma yanglur ta angashidang, iba ama tensa ka nung clean election ji kechi koma ka takok angutsü ta rataa bilem. Yakta dang ABAM aser NBCC densemer wadang tuluba nung clean election Nagaland ajak sünga yimyim nung, aikati meinyaktetaka ajak molung nung Clean Election angateta aru. Mezüng tenzükdang yongi noklang nung noklang takok angutsü masü ji, saka noklang shilem nung jenjang tuluba nguteta clean election takok nguogo ta nibo temolung süa bilemer. Tanabuba nung candidate-tem election nung takok ngur külen wara ka ama-i Nagaland ajongalen thanks giving sentep ayongba osang liasü. Ashiko kar dak alaka aika asoshi thanks giving sentep ji tetsüremtsüka dang sür alitsü akok.
Wapong S. Medem Kichu densema shirnokisa Laishiba aser ken kaket nung metokmeperi alibatem metongshitsür, ni dang masü tazünger ajak temoatsü nguya alitsü. Laishiba aser ken kaket orenosü ya tanga kaket orenosü (sentence composition) dang nungi jenjangji tajungba asütsü nüngdaker. Item kaket tasenba adoktsü reprangshiba mapang, nübu, rongsen aser mapang talila indoktsü nüngdaker. S. Medem-i March 07 nü ocet agütsübaji, nübur asoshi mapang jenti indoka bushir adoktsüba tajangzük akütba ocet ka lir.
Ao Laishiba o English Bible nung tenüng balala aliba ya, 24th March nunga Wapong Y. Yimti Tzüdir-i zülur ngua nia kanga pelaa liasü. Iba den külem-i April 1st nung Wapong T. Meren Paul-ia zülu. Tenati dang masü kaket zülur aikati Ao Laishiba o English Bible nung tenüng kasa dang amshitsü nükjidong nung züluba, ocet balala nung timtem kuli balala ajanga züngshia aruogo aser arudagi. Angazükba agi Laishiba ya NIV English nungi meyipzüka amshir. Greek, Hebrew, Ibri oshi balalatem nung nüngjatem ji balala liaka, English nung aliba nüngjatemji alima ajonga-i agizükteta amshir. English nungi dang Ao oshi agi meyipzük nung, tenüng paika balala aliba ya sayatenya ji ibaia ka asütsü aser joko tensa jagi mapet akümer. Asenok Nagaland nung dangangsüng kin shia oshi balala kar. Aser parnok den asenok samanir süa, Laishiba o agi anir keno ajak jembishinüdangji, parnok denbo English nüngja adoka jembitsüsa akümer. Iba mapang asenok kanga belemer. Tatishitsüka, 2017 küm tetenzüklen, Ao Senden nung lenir kati telok ka nung jembidang, “Ki Hoilibi Yona To Janibo Laki” ta inoksema jembi. Ni tsüngkosü waist coat semer liasü aser anasa alir telok jagi, “Yona To Kon Koi Asio” ta menüa asüngdang. “Aponikan Jona to amakan Yona asiho” ta langzüa onok ji ken menütep. Anungji yaktasa melenshitettsü ta bilema aliba mapangka, April 6 nung Rev. S. Temjen Longkümer-ibo Ao oshi olasü agi tenüng yanglua amshibaji tajungba ta oleplang agütsü. Ashiko pabo Reverend asünung, tanga kin denji pai timba ajuruya/jembishinüya alitsü aser timtem ji paiang timba ajuruya alitsü sernung ta nibo sasaa bilemtsür.
Ni medangshidaktsünüba kaji, ASLB-i ita aser anogotem Ao oshi agi meyipba ya lir. Nibo tamalen kechi amshia liasü, ibaji dang aginü. Saka ASLB aginübaji tuluka liasü südi aser osang kaket nung 2016 küm tetenzüklen sangdonga, asüngdangba ama aikati pei pei tangatetba tajung nung jayajakotemji agütsüdangogo. “Memetetba Department Tulu Ka Nung Pei Indang Agitsü Applicant tem Shimteta Yur Interview Aja ama” ashiko osang kaket nung jayajako agütsür indangbo kata magi südi. Ita aser anogo jayajako ya asenok-i abensaa amshia aruba jayajako ka masüji, ASLB-i tezülur ajak nungi agiteta amshitsü lemtet nungbo tajung liasü. Ao oshi samaa aoba tensa ka nung, ASLB-i ita aser anogo yangluba jayajakotem ya, Tir Yimyim osang kaket nung amshidar. Ibaji nüburtem-i ngur nemnemba agi kü tenarongbo mejonger odagi. Nüburtem-i tapi agi nemnemer asü atangji nung nemnemerar shisadangtsü nüngdaker. Itazüng nungi i ojangji agizüka zonizüng nung amshir ta ASLB ajanga metetdaktsüogo. Iba formula ji kanga junger. Tatsük (hot) aser asük (cold) olong ana nung tezülur kar atsütepa alibaji, asenok ajak-i ngudagi. Koba February ita TSÜKLAI ta yanglua lir aser ashishitepdagi, ibaji SÜKLAI ta t ji indoker amshitsü junger. Kechiaser tsürabur otsü nung February aser April mapang sangremsüyok otsü jembir. Iba jagi küm nung kanga mokonga asükba kuli ji sayur.
Kaketshirtem-i temaba jenjang nung takok angur mesüra pass asürtem ji alima-i konang küma züngshir. Aser parnok-i konang bener aruba ji alima-i tenüngsanga toshir. Tawa kaketshirtem result adoker külen, telok-tentet balala-i parnok-i konang bener aruba atema tenüngsanga toshiogo. Ano telok-tentet karibo shibai temaba jenjang nung konang bener arutetdir, naroküm (award) balala agütsütsü ta nangzüker atar. Telok tentet karibo konang aser tenüngsang olong ana ya benteta amshiba nguogo. Saka ano AKM tashi agi konang aser tenüngsang benteta mamshitetbaji sasaa bilemtsür.
ABAM-i Ken Kaket aser Temeshi Lai nung temetongshitsü ajitetbatem osang kaket nung masü, Mongdang office dangi dang zülutsü lemtetbaji (osang kaket adok May 25 & 26 – Wapong T. Meren Paul) atangji sürapang, iba osang ajanga nibo kanga aoksar. Tamalena Ao Senden office nungi iba mesükba ozüng osang kaket nung angu. Asenok lokti tulutiba anati yamaji telemtetba agiadokra, “Langtem dang tekong-i bener tua mesülok” ta jembiba ya tali shisangtsü. Akok nungbo iba ama pangzüng jibo tanü tensa nungbo mamshidaktsüner.