2018 Luchii tashi nungbo Jio ajanga Bengal nung aliba nütsüngyongsük ajak ayimjema service agütsütsü: Ambani

Aenjeti 16, 2018 (Agencies): Reliance Industries mendenbuba, Mukesh Ambani-i Sangtennü ashiba agi, Jio network ajanga 2018 Luchii tashi nungbo West Bengal nung aliba nütsüng yongsük noklang nung noklang shilem ayimjema service agütsütsü aser iba den külemi taruba küm asem tsüngda nung non-Jio business balala atema state nung sen crore 5,000 dak tema indoktsü.
Bengal Global Business Summit nung jembidang Ambani-i ashiba agi, par company ajanga state nung electronics manufacturing facility ka amenoktsü asoshi asadangdar.
“State nung tang Jio network ajanga jila 1,000 aser yimtsüng 39,000 ayimjema service agütsüdar. 2018 Luchii tashi nungbo Jio ajanga West Bengal nung aliba nütsüng yongsük noklang nung noklang shilem ayimjema service agütsütsü. Yimtsüng ajak 4G digital technology agi sendaktepdaktsütsü. Onoki Bengal optic fibre agi connect sütsütsüba atema project ka inyaktsü asadangdar,” ta pai ashi.
Paisa ashiba agi state nung Jio ajanga 2019 Luchii tashi nungbo kaket reju aser mozüki aser medical delivery facility sendaktepdaktsütsü.
Maneni pai-sa ashiba agi, par teloki digital service centres India ajunga nung amenoka odar aser iba ajanga sorkar aser nüburtem, talisa yimdak yimtsüng nung alirtem tali tajungba sendaktepdaktsütsü.
“State sorkar teyari nung onoki Bengal nung district pongu tashi nung iba centre ya amenoktsü,” ta Ambani-i ashi. Pai-sa ashiba agi iba ajanga mapa tali adokdaktsütsü aser nüburtem atema sen aatsüba lenmang sadema lapoktsütsü.
“Iba ajanga yimdak yimtsüng nung aser jila tilatem nung digital entrepreneurs adokdaktsütsü,” ta pai ashi.