2018 Mokokchung Inter-Club badminton championship Oct 18-20 asayatsü

MDBA ketdangsürtemi Mokokchung inter-club badminton championship dak sentakba nung press conference ka akaba sülen tangokba noksa nung angur. Mokokchung, October 15, 2018.

Mokokchung, Mongputeni/Oct 15 (TYO): Mokokchung District Badminton Association (MDBA)-i ayonga taküm agi küm asembuba Mokokchung inter-club badminton championship asayamung tan Mongputeni/Oct ita 18 nungi 20 tashi Mokokchung Badminton Stadium nung asayatsü, ta tanü MDBA ketdangsürtemi press conference ka nung metetdaktsüogo.
Iba asayamung ya tongtibangsa asen district nung badminton nüngtugu kümdaktsüba den badminton club balala jenjang ajungkettsütsü, lanurtem nem sabang lapokja aser ajungshia parnok tim lenmang nung anitentsü aser iba asaya ya taküm nung pei mapa ka ama bener odaktsütsü nükla yur taküm agi joko küm asembuba ayonga akar, ta iba asayamung tayonger, Er. Yanger Pongen-i osangbenertem den jembidang lemsatep.
2040 tashi nungbo Mokokchung district nungi Olympic nung shilem agitettsüsa asayar adokdaktsütsü MDBA nükla lir. Iba nükla dak rangloker MDBA-i lanur asayartem anitentsü atema asayamung balala den coaching camps/clinic sentong balala ayonga agia arudaki, ta paisa ashi.
MDBA tenzüker külen nungi district nungi asayar tajung aika adokyonga arudaki. Asayar aika sorkar department balala nung mapai igo aser lanurtema aika sports quota nungi riju balala nung admission agiba lir, ta paisa shisem.
MDBA nükjidong balala ataloka aotsü atema MDBA kisüngibo mayimjemmatsü, anungji, kija, kibong aser telok balalai nungita aser shilem agia yari nung dang iba association ya tashi itta aser mapa balala takok ngua alizüng tongtettsü onoki imlar, ta paisa ashi.
Taküm iba asayamung nung club 7-i shilem agitsü asoshi tenüng agütsüogo. Itemji; Longsa Sporting Club, Golden Feathers Chungtia, Native Shuttlers Mopungchuket, The Shuttlers Chuchuyimpang (A), The Shuttlers Chuchuyimpang (B), Badminton Association Khensa, Soyim Smashers Ungma nungertem lir.
Taküm iba asayamung nung shir teloki mezüngbuba jenjang nung takok ngudir parnok nem sen 50,000/- aser tanabuba jenjang angur nem 30,000/- agütsütsü renema lir, ta tayongertemisa metetdaktsü. Iba asayamung nung amshitsü atema shuttlecock-ji Dimapur nung aliba G Sports puri sponsor asütsü nangzüka lir, ta parnokisa ashi.
Iba asayamung ya best of seven matches yimya nung asayatsü aser asaya telemsa yamai alitsü; Under 13 Boys Single, Men Doubles, Under 15 Girls Single, Veterans 35+ Men’s Doubles, Under 17 Boys Singles, Veterans 45+ Men’s Doubles aser Junior Mixed Doubles. Iba asayamung ya Mongputeni/Oct 18 nü nikongdang 2:00 ako nungi tenzüka asayatsü sentong renema lir.