2018 nungi tenzüka Assam nung aadhaar cards yanglutsü

Guwahati, November 27 (Agencies): Assam nung 2017 küm National Register of Citizens (NRC) update asüba sülen 2018 küm Aadhaar cards yanglu tenzüktsü.
Assam nung alirtem küm ka shi Aadhaar cards dak sendakba ken o nung kechi inyakjar mejangjai arur tang iba inyakyim ya inyak tenzüktsü asoshi sorkari tetuyuba agütsüogo. Iba inyakyim atema tenüngdakba administrative mechanism tem ajak renemogo.
General Administration Department (GAD), State registrar kümdaktsüogo aser parnoki iba dak sendakba nung bid (RFB) asütsüba atema tejangrartem jaokogo. RFB agütsütsüba atema tatembangbuba anogoji December 6nü asütsü aser iba sülen tasüngnü nikongtsütsü 1:00 ako nungi bid asütsü lapoktsütsü.
Aadhaar enrolment atema Assam zone 10 küma lemsar lir aser GAD puri item zone shia atema bids balala nüngdaker.
Bids atema mapang lapoktsüba sülen State Aadhaar Implementation Committee aser Unique Identification Authority of India (UIDAI) den tangatettep nung iba inyakyim atema agencies tem shimtsü. SAIC nung Chief Secretary mendenbuba lir.
UIDAI nung züngoksema aliba agencies tem bidding process nung shilem agitettsü. Parnok nem iba inyakyim atema küm ka mapang agütsütsü.
Osang ka ajanga ashiba agi, inyakyim ajak sentong yanglua aliba ama dang ora iba inyakyim taküm December tatem len nungi mesera 2018 January tetenzük nung tenzüktsü.
Iba inyakyim atema enrolment centre ajak senteper 7,986 amenoktsü aser item rongnung centre 5,985 teti atema asütsü aser tanungbatem kinük nung aliba tesemtem atema mobile centres asütsü.
GAD puri Deputy Commissioners aser Sub-divisional Officers (Civil) tem dang iba inyakyim atema centre lapoktsüba asoshi tesem aser ki shimtsü asoshi tetuyuba agütsüogo.
Aadhaar nung züngoksemba sülen Aadhaar cards tem kija shia dangi angati agi post ajanga yoktsü, anungji address proof dena jangja jangjaa inoktsütsüla. Osang ajangasa ashiba agi Adhaar nung züngoksemtsüba atema tanga tenüngdakbatem tatsüka lir metetdaktsütsü.
Assam nung iba inyakyim atema sen indokba ajak tanga state nung ama UIDAI puri aachayangtsü.
UID inyakyim ya state nung lokti tentet aikati anemba sülen mapa küma inyaka moteti liasü. Parnoki ashiba agi, iba ya ozüng alema kuli kaket tejangja makai Assam nung bendanger arua alirtem atema parnok lisopur ta kuli sayutsü asoshi ano kuli kaket ka akümtsü. Item lokti temi NRC inyakyim tembangba sülen ang iba ya tenzüktsü asoshi akhang.