2018 sülen Kolkata nunga driver-i maniba train jajatsü akok

Kolkata, December 17 (Agencies) : Kolkata nunga driver-i maniba Metro train tem memenui jajatsü akok, ta tanü Indian Railways Director Yatish Kumar-i ashi.
“Grade of Automation 3 (GoA 3) inyakyim nung ajemdaker driver-i maniba train ji Kolkata nunga bilemba tang masü saka asangsang nung amenoktsü. Tang yimti nung aliba metro lenmang tasen ajak 2018 March ita nungibo driver-i maniba train, GoA 3 atema akümtsü nükjidong lir,” ta Research Design & Standards Organisations of Indian Railways nung Director, Yatish Kumar-i ashi.
GoA 3 ya driverless train operation (DTO) lir aser iba train ayamesodang aser tanendang pasasa mapa inyaker. Train nung attendant jagi train kishi lapokli shibangli ta asüba dak alaka pa atema tang mapa kecha mali.
China nungi bener arutsü aliba train lenmang yangluba osettemji tang East-West aser Dum Dum-Garia metro lenmangtem dena tang yimti nung aliba metro tem atema lir, ta pai ashi.
Chennai, Bangalore aser Lucknow yimtitem nungbo GoA 3 amshidar. GoA 4 ang shitakba driver-i maniba train lir aser iba train nungjibo kishi lapoktsü aser shibangtsü atema attendant-a mali. Iba train ji tang New Delhi Metro nunga ka tendangdar, ta Kumar-i ashi.