2018 tashi nung India-Pak arrtsü ajak shibangtsü: Rajnath

Oct. 07, 2016 nü Jaisalmer nung Home Minister, Rajnath Singh leniba nung Rajasthan, Gujarat, Punjab aser J&K Chief Minister tem/Home Minister tem senden amenba noksa nung angur.

Jaisalmer, October 07 (Agencies): Hokolbarnü Union Home Minister, Rajnath Singh-i, 2018 küm December ita tashi nungbo India-Pakistan arrtsü ajak shibangtsü, iba mapa atema mapang telemsa nung inyaktsü, ta metetdaktsü.
Pakistan den arrtsüa aliba state pezü- Jammu & Kashmir, Punjab, Rajasthan aser Gujarat state tem nungi Home Minister tem den senden ka amenba sülen Union home minister-i iba sangdong agütsü.
Senden tembangba sülen osangbenertem den jembidang Rajnath-i, “Atemzüka aliba mapang tashi nung mapa atemtsü asoshi jenjang balala nung sentong yanglua inyaktsü. Iba maparen ya security agency temi dang masü saka state pezü nungi chief secretary temi densema ketdangsüa inyaktsü. Iba maparen takok angutsü atema ita shia, küm nung pezüben aser kümshia khen maparen reprangshia inyaktsü,” ta ashi.
Paisa ashiba agi, tekong-tenem tesem tamajungtem nungbo Army dak alia sorkari technology amshia inyaktsü.
“Tang benoka aliba security grid ji mapatong tasen ka asütsü. Tesülen sorkari iba indang metetdaktsütsü. Tashimait ajakji Army temi dang masü saka arrtsülen aliba state tem nungi Chief Secretary temi dena ketdangsüa inyaktsü. Mapang shitak nung tashimaitbatem metongshia inyaktsü,” ta Home minister-isa shisem.
India aser Pakistan na tsüngda tesentaktep tamajungba küma aoba dak sentakba nung tasüngdangba ka langzüdang Singh-i, “Linüki army dak tamang katettsüla. Linük security ji lendongi aitsüsa masütsü. Aluyimer kati tsünüsempongtsü kümzüka ayuba ama asen sepaitemi linük kümzüka ayutsü,” ta ashi.
Singh mendenbuba ser amenba senden nung Rajasthan chief minister Vasundhara Raje, Punjab deputy chief minister Sukhbir Singh Badal, Gujarat home minister Pradeepsinh Jadeja aser Jammu & Kashmir chief secretary Brij Raj Sharma nunger aden.
Kasa senden nung BSF nungi tongti ketdangsertema dena liasü.