2018 tashi nung ISL o I-League ka küma lokteptsü: AIFF

New Delhi, April 20 (Agencies): India nung tongtipangsüa ayonga asayaba football asayamong 2 – Indian Super League (ISL) aser I-League na 2018 küm tashi nungbo ka küma lokteptsü alizüng ayuba osang ka India nung football asayatsüren ketdang asür, All India Football Federation (AIFF) nung General Secretary, Kushal Das-i tanü, Bodbar nü metetdaktsüogo.
“Tan alizüng ayubaji asayamong 2 ka küma lokteper dang masü saka India ajunga nung tentetba football teloktem aküm ka kübok aitdakja India’er football jenjang tajungba kümdaktsütsü alizüng ayur lir,” ta pai ashi.
India nüburtemi I-League asayamong mesapuba yong 2004 küm nungi tenzüka ISL asayamong ayonga asayatsü tenzükba osang bushiteta lir.
Ajisüaka, alima ajunga nung football asayatsüren ketdang asür, FIFA-i linük ka nung football asayamong 2 tashi kasa küm nung ayonga asayabaren magizükba den külemi, mezüngsüa ayongba I-League asayamong ang agizükba yong AIFF-i asayamong anaji ka küma lokteptsü alizüng ayur lir.
Angazükba agi, Mohun Bagan, East Bengal aser tawa I-League champions akümer, Bengaluru FC teloktem tan lokteptsü renemba asayamong nung shilem agidaktsütsü renema lir.
Ano külen, India nung sangküm, 2017 küm asayatsü ayongba Under-17 World Cup asayamong takok ngua ayongtsüsa nungdakba ki o jen temulungsüa renemba osang ka Das-isa metetdaktsüogo.