2018 tashi nung Nagaland Open Defecation Free State akümtsü

Kohima, June 9 (TYO): Public Health Engineering Department (PHED) Minister, Chotisuh Sazo-i ashiba agi, “Sangküm küm tetenzüklen Nagaland ya Open Defecation Free (ODF) state ka ta sangdongtsü.”
Kohima nung Angami Mechü Krotho (AMK)-i ayongzükba ‘Sanitation Workshop for Women Leaders’ nung jemdidang, Chotisuh Sazo-i iba osang metetdaktsü.
Iba maparen atema mezüngbuba shilem nung Nagaland district 11 kübok trok nung taküm July ita Open Defecation Free (ODF) ta sangdongtsü. District trokji Dimapur, Kiphire, Longleng, Mokokchung, Phek aser Zunheboto lir, ta paisa shisem.
“Centre-i tenzükba Swacch Bharat Mission kübok Nagaland state nung metsümeshidak 2,62,939 yanglutsü aliba nungi 2,11,723 yangluogo. Ibaji kilen noklang nung shilem 80.52 shi lir” ta Minister-isa metetdaktsü.
Sangküm küm tetenzüklen tashi nung ODF Nagaland kümdaktsütsü atema ano teinyaktsü aika lir. Asenoki yimyatsüya benshia arubatem melenshitsü atema inyaktsüla, ta paisa shisem.
Centre sorkari Swacch Bharat mission kübok October 2, 2019 tashi nung linük ajunga ODF kümdaktsütsü atema alizüng lir. Mahatma Gandhi sor küm 150 ajungba tasoba anogomung nung India kübok yimtsüng tia nung aliba tesemtem nung, sen crore lakh 1.96 endoka metsümeshidak million 12 yanglutsü alizüng lir, ta Sazo-isa metetdaktsü.
Nija, telok ka mesüra lokti indang metsümeshidak yangluba ajanga linük nung moapu nung sü kozüba inyakyim anendaktsütsü atema iba mapa inyaker. Anungji, iba mapa ya sorkari kijai masü saka NGOs aser civil society temia yaritepa inyaktsüla, ta paisa ayongzük.
PHED Minister-isa asen temang nung tashidaktem den raratsü atema tzü tajung ajemtsü indang tayongzükba agütsü.
Tzü peria ajemba ajanga asen mang nung tashi agütsür, anibelem agientsür, temang seret touzük ajema akümba ajungkettsür, toxins endoktsür, teküp tajungba kümdaktsür, immune system tashi idaktsür aser ano teyari aika agütsür, ta Sazo-isa shisem.
Sentong nung PHED Chief Engineer Kevisekho Kruse-ia o jembidang, iba ama workshop ajanga teküpoktiba jenjang nung aliba tetsürtem dang merükmejua alitsü tesayuba tajung agütsütsü imlar, ta ashi.
Sentong nung mendenji AMK tir Ruokuoheü Miachieo liasü, SFS Kohima Parish Priest Rev. Fr. Alex Vizo-i temoatsü meshia sarasadem, Keneisedenuo Zatsu-i ken ka aten aser AMK general secretary Kevinguno Meyase-i anküp tepela o jembi.
Sentong nung Water & Sanitation Support Organization(WSSO) Director, PHED, K G Sumi-ia o jembi aser AMK Advisor Salhoutuonuo Kruse-i “Sanitation and good sanitary practices” aser Kohima College Vice Principal, Thinuokhrieii Tsiekha-i “Waste Management” onüktem indang workshop agi.