2018 tatem tashi nung ki ajak nung light alitsü : Nitish Kumar

Patna, November 15 (Agencies) : Bihar state nung aliba ki ajak nung taruba küm ana tsüngda nung light alitsü, ta Mongulbarnü state chief minister Nitish Kumar-i metetdaktsüogo.
Pai, “2018 küm tatem tashi nungbo Bihar nung aliba ki ajak nung light agütsütsü onok nükjidong lir,” ta state nung ‘Ki ajak nung light mesangoktsütsü’ (‘Har Ghar Bijli Connection’) scheme lapoktsüba mapang ashi.
Aji oda süaka pai, nüburtemi light bill shitak agütsütsüla kechiba süra state sorkari kodanga light angadi agütsütsü nangzüka mali, ta shisem.
“Onoki kodanga electric angadi tsükdaktsütsü nangzüka mali. Nübur ajaki pei atsüngba yari light bill shitak agütsütsüla. Ya kodanga angadi magütsütsü,” ta pai jangjashitsü.
Nitish Kumar-i, state sorkari nüburtem dang nangzükba ama Asian Development Bank nungi teyari agia state nung aliba ki ajak nung light mesangoktsütsü, ta ashi.
Pai, state sorkari above poverty line (APL) pur ki lakh 40 tashi nung ano light mesangoka maliba asadangtetogo, ta ashi.
Ajisüaka kodang kanga junga asangdangdir sate nung electricity tsütsü terenlok kanga lia melenshiogo ta ashidang chief minister-i, Bihar nung capita shia light atsükba 2005 küm tashi unit 70 dang aliba tangbo unit 258 atsüker anungji 2005 küm 700 MW ang nüngdaka aliba tangbo 3,769 MW nüngdaka kümogo, ta ashi.
2015 Bihar Assembly election mapang Nitish Kumar-i Janata Dal-United (JD-U), Rashtriya Janata Dal (RJD) aser Congress loktepba teloki sorkar akümtsü maongka angu nungbo state nung aliba ki ajak nung light mesangoktsütsü nangzüka liasü.