2018 WC nung Video Referee amshidaktsünür: Gianni

Zürich, December 17 (Agencies): Russia nung asayatsü ayongba 2018 World Cup football asayamong nung video referee tetendangbaren amshidaktsünüa bilemba olen ka alima ajunga nung football ketdang asür, FIFA nung Tir, Gianni Infantino-i tanü, Honibar nü sangoktsüogo.
Japan nung asayaba 2016 Club World Cup asayamong asaya nung tan asensa amshitsü tenzükba Video Assistant Refereee (VAR) technology tendanga amshia, referee-i Japan champions, Kashima Antlers telok nem penalty metsütsü maongka agütsüba ajanga tamakok anguba sülen Colombia nung tentetba Atletico Nacional teloki VAR amshibaren aitsüogo.
Football asaya tanga ka nung Portugal nunger Cristiano Ronaldo-i par Real Madrid telok tenüng nung goal agütsüba den sentakba nung VAR amshia agütsüba obendang terata nung tembanga liasü.
“VAR system takok ngua amshitsü mapang metongi lir. Ajisüaka, iba asaya tendangtsü yimya tasen den sentakba tashi maitbaren ajunga agiener külen VAR tetendangbaren ya taruba World Cup nung takok ngua amshitsü alizüng lir,” ta Gianni-i osang jangjashitsü.
Referee-i VAR tetendangtsü teyari agia, Antlers telok nem penalty metsütsü obendang agütsübaji shitak obendang agütsü ta shia, “Referee-i video tanaben reprangshitsü maongka manguka asübo pai obendang shitak magütsütettsü liasü,” ta Gianni-i VAR tetendangbaren metentsüba olen ka sangokja liasü.