2018 World Cup atema Russia terenemba agi FIFA tenük asünger

Moscow, February 10 (Agencies) : Alima nung football asaya azüokba telok tulutiba, FIFA, nung Secretary General Fatma Samoura-i 2017 Confederations Cup aser 2018 World Cup atema Russia terenemba ngua tenük asünger, ta Russia Deputy Prime Minister Vitaly Mutko-i ashi.
Samoura-i tang Russia official süa semdangba mapang ka lir, ta osangbenertemi ashi.
“FIFA Secretary General Fatma Samoura ya tang Moscow tonga lir,” ta Brihostibarnü Russian Football Union (RFU) nunga Tir, Mutko-i ashi.
“Onoki lai 2017 Confederations Cup aser 2018 World Cup atema bilema alibatem rasaa jembiogo aser lai item nung tasüngdangba kecha maliasü. Samoura-i TV nung item asaya yoktsü temeden indanga benoka jembi. Onoki la den amalitepa inyaktsü mulunga lir ajisüaka ajakji FIFA kübok inyaktsü,” ta Mutko-i shisem.

You must be logged in to post a comment Login