2018 World Cup qualifier: Argentina & Brazil nati takok angu

Mendoza, September 02 (Agencies): Argentina nunger football asayar mongin, Lionel Messi-i takokba goal agütsüba ajanga par Argentina teloki goal 1-0 agi Uruguay telok madak takok ngua 2018 World Cup qualifier asaya yashi, Brehostibar nü asayaogo.
Chile telok den taküm June ita tamakok ngua Copa America Centenario asayamong final asayaba sülen Messsi-i international football asayatsüren toktsütsü lemtetba osang sangoktsü saka pai iba telemtetbaji tanaben agishia, par Argentina telok tenüng nung maneni asayatsü lemtetshiba sülen pai tan mezüngsüa par linük tenüng nung takok ngua shilem agir lir.
Barcelona superstar, Messi-i takokba goal-ji yashi asaya tenzüker minute 42 buba nung agüja liasü.
Argentina teloki tan takok anguba sülen par teloki asaya 7 nung ajak agi points 14 points ajangzükogo.
Ano külen, Brazil telokia goal 3-0 agi Ecuador telok madak takok ngua par qualifying asaya asayaba osang jangjaogo.
Gabriel Jesus-i goal 2 agütsüba den külemi, Neymar-i penalty takok ngua metsüoktsüba ajanga taoba mapang world champions akümtsü jenjang 5 ben tashi ajangzüker, Brazil teloki takok ngua liasü.
Ecuador goalkeeper, Alexander Dominguez-i foul menazükba sülen arishi küm 19 tain Jesus-i penalty kick takok ngua metsüokja par Brazil telok asoshi 1 buba goal agütsü.
Asaya tembangtsü minute 3 shi anünga alidang, Neymar-i Mercelo-i yanglutsüba cross ball agizüka, par telok asoshi 2 buba goal agütsü aser asayatsü tembangtsü second ishika anüng alidang Jesus-i par telok asoshi 3 buba aser takokba goal agütsü.
Tan takok anguba sülen Brazil telokia asaya 7 nung ajak agi points 12 ajangzüka temaba jenjang nung alir telok tarensen nung 5 buba jenjang angur telok kümogo.
Ano külen, Colombia telokia goal 2-0 agi Venezuela telok madak takok ngua asayaba sülen par telokia ajak agi points 13 ajangzükba osang jangjaogo.