2019 Aami tashi nungbo 2G amshir melei akümtsü: CMR

Aenjeti 13, 2018 (Agencies): Mobile data rates ajema akümba aser 4G chipsets jenjang temelaba akümba ajanga India nung 2019 Aami tashi nungbo 2G internet subscription shibangtsü akok, ta tanü CyberMedia Research sangdong ka ajanga metetdaktsüogo. “Jio shishilembadaki aitba sülen 2020 first quarter tashi nungbo India nung 2G internet services amshir shilem tazüngla akümtsü,” ta Telecommunications and ESDM, CMR Principal Analyst Faisal Kawoosa-i sangdong ka ajanga metetdaktsü.
Iba sangdong nung ashiba agi, Reliance Jio marudangbo wireless narrowband, low-speed internet amshir quarter shia average nung shilem 3 samaa oya liasü aser Jio aitba sülen iba ya shilem 4 tashi aküm. “Feature phone tem nung dena aser smartphone nung 4G ya default wireless internet access ka ama küma odar,” ta kasa sangdong ajanga metetdaktsü.
4G phone tem nung Jio puri cashback offer agütsüba sülen Airtel aser Vodafone puria iba amala mesükba sentong ya jenjang temela agi smartphone yanglua ayokertem den longjemer inyakdar. “4G data nung jenjang tajemba akümba aser tier 3 yimtitem aser yimdak yimtsüngtem nung wireless dang nungi internet amshiba tali akümba ajanga kümtem tsüngda nung 4G mesera broadband amshir tali akümtsü,” ta kasa sangdong ajangasa metetdaktsü.