2019 dak rangloker Mamata-i lennirtem ajurur

New Delhi, Luroi (August) 1 (Agencies): West Bengal chief minister Mamata Banerjee-i anogo asemnü atema Delhi semdanger aser lai opposition party lenirtem den BJP anemertem den ajuruteper.
“2019 nung BJP tembangtsü” ta lai Bengali oshi nung osangbener dang ashi.
Aenjeti (January) 19 nü lai mega-rally ka alitsü ayongzüka lir aser iba nung lai yimten lennirtem adentsü jaoknür ta tanü Mamata-i ashi. Iba rally ajanga 2019 national election jakdang opposition longjemba sayutsü ta lai shisem.
Tanü nikongdang lai Congress lennirtem- Sonia Gandhi aser lar jabaso Rahul Gandhi na den ajurutep.
2019 nung combined opposition atema Mamata Banerjee mesüra Mayawati Prime Ministerial candidate asütsü mulunga lir ta tawa tu Rahul-i shiogo.
“PM ji yaser lemtettsü, tamasa asenoki BJP tamakok ngudaktsüdi” ta Mamata-i tanü osangbener dang ashi.
Assam nung NRC final draft nung nisung lakh 40 shi ka madenba atema yimten ken o ka kümer atsütepba mapang Mamata-i Gandhi’er kibong den ajurutep aser iba ya opposition party tem atema 2019 election nung tammetdak ka asütsü.
“Onoki yimten tensa aser tarutsü nung külemi yariteptsü indang lenmang bushitep. 2019 nung collective leadership asütsü, mezüngbuba teinyaktsüji BJP atsüngdoktsüba lir. Onok külemi yaritepa tokteptsü. Tashi tait party temi pei pei state nung tokteptsü. Onok ozü state nung tashi itta lir, anungji onok sasa tokteptsü” ta WB Chief Minister-isa ashi.
Mamata Banerjee-isa tanü YSR Congress yimsüsür Sai Reddy den ajurutep aser idangji pai la nem pink rose ka agütsü.
Yashi lai Nationalist Congress Party lennir Sharad Pawar den ajurutep aser iba sülen BJP MP Shatrughan Sinha aser taoba union minister tem- Yashwant Sinha o Ram Jethmalani nunger den ajurutep. Par asemprongla BJP inyaksangshi anema jembirtem lir.
“Ni parnok dang Kolkata rally nung adentsü atema jaok. Sorkar kümteta aliba party anema rarartemi takok angur” ta Ram Jethmalani’er kidang senden amenba sülen lai osangbener dang ashi.
Tanep Mamata-i BJP lennir tejen aser taoba Deputy Prime Minister LK Advani den ajurutep.
“Ni mapang talangka tejakdang nungi Advani den metettepa liasü. Ni pa den ajurutep aser pa temang indang osang metetpela” ta lai ashi.
Osang angazükba agi Mamata-i Delhi semdangdang Advani den teti ajuruteper.
Tanü Mamata-isa Congress lennirtem Ahmed Patel aser Ghulam Nabi Azad, Samajwadi Party lennir Ram Gopal Yadav, AIADMK lennir M. Thambidurai, Kerala Congress-Mani lennir Jose K. Mani aser Samajwadi lennir Jaya Bachchan nunger den ajurutep.
Mamata-i Parliament indang Central Hall nung Andhra Pradesh nungi TDP MP tem den ajurutep. Parnoki taküm March ita BJP-i aniba sorkar teloktep nung madentsü lemtet.