2019 election atema Modi-i BJP CM tem senden ayonger

New Delhi, April 21 (Agencies): 2019 küm Lok Sabha elections nung rangloker taruba Deobarnü Ato kilonser, Narendra Modi-i Bharatiya Janata Party-i yimsüsüba state tem nungi Chief Minister tem den senden amentsü aser iba senden nung BJP Tir, Amit Shah-a adentsü, ta osang ka ajanga metetdaktsü.
Tawa Modi-i senden ka ayonga NDA nung teloktep party tem dang 2019 Lok Sabha election nung yaritsü asüngdanga liasü.
Osang ajanga ashiba agi, Modi-i iba sendenji 2019 küm Lok Sabha slection nung rangloker ayonger.
Ano 2018 küm nunga BJP-i yimsüsüba state asem- Chhattisgarh, Rajasthan aser Madhya Pradesh nung assembly election agitsü.
Ano taküm küm tatemlena BJP-i yimsüsüba state Gujarat nung assembly election agitsü.
BJP lenir kati ashiba agi, 2019 küm election nung party tamakok angutsüsa inyakba mapatemji Modi-i magizüktettsü.
Paisa, party inyakyim aser assembly election tem nung takok anguba ajanga Lok Sabha elections 2019 atema party jenjang ajungtsü.
Pai ashiba agi, Modi-i party lenirtem ajak dang akok tashi mangatettep ken otem nungi pilaa alitsüla, ta metetdaktsüogo.
Deobar senden nung Modi-i Chief Minister tem dang lokti nung o jembidang kanga kümdanga tashishitsü meketi jembitsü atema tuyutsü ta osang ka ajanga ashi.
Tawa Odisha yimtiba, Bhubaneshwar nung BJP executive senden amenba mapang nunga Modi-i party lenirtem dang, pei inyaksangshi aser jembishinü kanga kümdangtsü metetdakja liasü.
Tang linük nung BJP-i yimsüsüba state 13 lir aser state pezü nung tanga party tem den teloktep sorkar lir.