2019 election matongdang Modi sorkar atsüngdoktsü:Congress

New Delhi, April 17 (Agencies): JD(U) Tir aser Bihar Chief minister, Nitish Kumar-i linük ya RSS maliba tesem ka kümdaktsütsüla, kechiyong parnoki linük telongjem aser democracy amokmerener ta jembiba o pusema Congress-ia jembiogo, ajisüaka Congress-i, 2019 küm Lok Sabha election matongdang BJP anema national-level nung teloktep tentettsü atema party temji tera yanga alitsüla, ta ashi.

Congress-i, linük nüburtemi Modi’er sorkar atsüngdoktsü, anungji lokteptsü atema menüngdak, ta ashi.

Nitish leniba nung party tem lokteptsü asü ta asüngdangba langzüa Congress general secy., Shakeel Ahmed-i, “2019 elections atongdangbo nüburtemi Modi sorkar atsüngdoker alitsü, anungji party tem lokteptsüji menüngdaktsü,” ta ashi.

Bihar sorkar teloktep nung Congress densema lir aser Congress lenir Ahmed-i, “Linük ya RSS   aser BJP maliba tesem ka kümdaktsütsüla, kechiyong parnoki linük telongjem aser democracy amokmerener,” ta ashi.

Linük jenjang nung party tem teloktep dak sentakba nung Ahmed-i, state ka nung party kar tashi itta liaka kidanger state kar nungbo parnok tashi iita mali, ta ashi.

“Tang tashi nungbo linük jenjang nung teloktep mali. Party tem linük jenjang nung tera yanga alitsüla. Party aika pei state nung ang tashi itta lir aser state-level nung telokteptem lir aser ibaji ataloker,” ta pai ashi.

BJP anema teloktep anitsü atema Rahul Gandhi madak Kumar shimmer asü ta asüngdangba langzüdang Ahmed-i, “Onok tsüngda rara mali. Onok ajak külemi lir, saka onok melongjemdangyongi linük nüburtemi Modi atsüngdoktsü. Tensa melenshidar. Lohia-i Congress anema inyak, ajisüaka tanübo Congress aser Lohia pusemertem longjema kasa teloktep nung lir,” ta ashi.

Linük jenjang nung Kumar ji lenir shimtsü asü, ta asüngdangba langzüdang pai, “Nitish ya ozü teloktep nung nüngtugu chief minister ka lir aser pai mapa tajung inyaker,” ta ashi.