2019 election sülen India den yimjung ken o jembishitsü: Imran Khan

Riyadh, Mongputeni/October 23 (Agencies): Pakistan Ato Kilonser Imran Khan shiba tang Saudi Arabia yimtiba Riyadh nung par linük asoshi International Monetary Fund dang nungi loan meshi oa lir, pai Sangtennü ashiba agi, pai India den yimjung yanglutsü asoshi merangdangogo saka India-i kecha telangzüba magütsü.
Paisa, taruba küm election tembangba sülen India den tesendaktep yanglushitsü asoshi ken o jembishinü tenzüktsü imlaba lemsatep.
Rongjui/Sept nung India aser Pakistan foreign ministers senden ka akatsü asoshi renemer liasü saka India-i thitsü. BSF sepai ka tepsetba aser Pakistan postage stamp ka ajanga anti-India separatist ajungkettsür ta shia India-i iba senden nung shilem magitsü asoshi telemtetba agi.
Pakistan-i ashiba agi, taruba küm national election magi tsüngda sensaksem masütsü asoshi India nunger tejenbolen bushirdang lir.
Pakistan, tang International Monetary Fund (IMF) aser linük kar nungi loan agia sentsü aotsü aser parnok economy ajungkettsü asoshi sentong lir. “Onoki IMF aser linük kar nungi loan angutsü imlaa atar,” ta Khan-i Riyadh nung investment conference ka nung ashi.
Paisa, par linük nung nüburtem tenüngdakba peridaktsütsü asoshi oil refineries ana nüngdaker aser iba dak sendakba nung Saudi investors tem den jembishinüdar, ta ashi. Saudi Arabia’s Crown Prince Mohammed bin Salman-i Pakistan nung invest asütsü atema Saudi businessmen kar ayongdendar, ta Khan-isa ashi.
Chiteni/July Ato Kilonser mendeni atuba sülen Khan-i lenmang balala nungi teyari bushidar. “Tanga linük dang nungi tali tang Pakistan nung yimjung aser security nüngdaker,” ta Khan-i Sangtennü ashi.