2019 Elections nung VVPATs amshitsü: EC

Delhi, April 19 (Agencies): Bodhbarnü Election Commission (EC)-i, 2019 küm General elections matongdang Voter Verifiable Paper Audit Trail (VVPATs) peria amshitsü atema jelia inyaktsü, ta metetdaktsü.
“Supreme Court-i tuyuba ama Commission-i inyaktsü aser 2019 küm elections nung polling station ajak nung EVM shia nung VVPATs amshitsü atema inyaktsü,” ta Election Commission-i metetdaktsü.
EC-i paper trail machine densema Electronic Voting Machines alitsü atema mepishia liasü aser tanü Union Cabinet-i ibaji agizük.
Congress, Bahujan Samaj Party aser Aam Aadmi Party (AAP) densema party aikati, EVMs ji tamper sütettsü ta shia opposition party temi tarutsü mapang nungbo election nung EVMs den paper trail machine amshitsüla ta takhangba agütsüba nung ajemaker EC-i iba mera ya agia liasü.
Paper-trail Machines alitsü atema Election Commission-i mepishiba ama sorkari sen crore 3,174 agizükogo.
O tatsüka lemtepba sülen Ato kilonser, Narendra Modi leniba nung Cabinet-i iba temepishibaji agizük.
Linük tesem ajungalen amshitsü atema Paper trail machines alitsü asoshi EC-i sen crore 3,174 cabinet dang meshia liasü.
2014 küm June ita nungi Commission-i 11 ben tashi Centre dang VVPAT machines alitsü atema mepishia arua liasü.
Yaküm Chief Election Commissioner, SNA Zaidi-i shidi ka ajanga Ato kilonser, Modi dang paper trail machines alitsü atema senotsü nüngdaker, ta metetdakja liasü.
Supreme Court-ia Commission dang, koba mapang nungi polling station ajak nung VVPAT machines amshitettsüar iba mapangji metetdakjang ta tuyuogo.
VVPATs lakh 16 dak tema atema PSUs ana- ECIL aser BEL-i ita 30 nüngdaktsü, ta EC-i metetdaktsü.
VVPAT gol ya nisung kati vote agütsüba sülen pai vote agütsüba party indang slip ka gol nungi aludaktsüba machine ka lir.
Iba slip ji ‘box’ ka nung tsüktsü, saka vote agütsüsang jagi ibaji kidangibo bener moutettsü.
Vote agütsüsangjagi iba slip ji second 7 shi dang reprangtettsü akok.