2019 HSLC topper Wangshitemjen Ozüküm den sensaksem

Mokokchung, May 2 (TYO): Lesson bushitsü atema mapang kecha balaka lateta mayu, saka kodangsa lesson bushidir, idangji nentaka aser temulung agüjasa azüng, ta Nagaland Board of School Education (NBSE)-i agiba 2019 HSLC tatidang nung tematiba jenjang (Top 1) ngutetsang Sp. Wangshitemjen Ozüküm-i iba osangbener den jembidang lemsatep.
Arishi küm 16 tain Sp. Wangshitemjen Ozüküm ya Mongsenyimti nunger Wb. Tulumatsüng aser Wt. Opangmenla na jabaso lir. Pa ya tila asüdang nungi Queen Mary Higher Secondary School Mokokchung nung dang zünga intet. Pai HSLC tatidangji noklang shilem nung 98.00% nung takok nguteta liasü.
Iba osangbeneri pa dang iba jenjang ajangzüktettsüsa tajungshirji shiba liasü? ta metetnüa asüngdangdang, “Tamasa Tsüngrem nem tenüngsang agütsür kechiyong Pa temoatsü mali asübo ni iba jenjang ya majangzüktetla, iba den külemi kü tsürabur aser kinungertemi lesson meranga azüngtsü ajungshi aser school nung tesayurtemi shisa tajung agüja nentaka sayuba ajanga lir”, ta langzü.
Tatidang agütsüba mapang koma renem? ta metetnüa asüngdangdang, “lesson bushitsü atema mapang kecha balaka lateta mayu saka kodangsa lesson züngdir idangji temulung ajak agüja nentaka azüng”, ta ashi.
Nai Top 1 nung adoktsü imlaa liasü asü maliasü? ta metetnüa asüngdangdang, “Ni iba jenjang tashi atongtsübo kecha imlaa maliasü”, ta menürema ashi.
Iba ya sür kechi azüngtsü aser taküm nung kechi kümnür? ta asüngdangba mapang, “Ni Science azüngtsü tebilemba lir saka kechi akümtsü’ar ibajibo lemteta mali, saka ajakji mapangi bener arutsütsü”, ta ashi.
Sp. Wangshitemjen Ozüküm ya class 1 nungi 1st division nung dang takok ngua atuba kaketshir tajung ka lir, ta angazüker. Pa azünga alidang football asayaba nung mapang teimbaka intoker. Par ya Mokokchung yim kübok Anangmen Sector nung alir. Pa ya kibong nung tambusang aser pa tenu tetsür chanu ana lir.