2019 küm nunga BJP-i Modi lenir aginer

Bhubaneswar, April 16 (Agencies): BJP-i aniba NDA sorkari sensakertem atema inyakba tenüngsanga Deobarnü BJP-i, 2019 küm nunga Ato kilonser, Narendra Modi leniba nung sorkar akumtsü atema yaridaktsüner, ta nüburtem dang mepishiogo.
Odisha nung anogo ananü BJP National Executive senden amenba mapang nung renemba party bangzüng nung, “Tesüiba küm asem tsüngda Ato kilonseri kanga meranga inyakogo, pai jembiba ama mapa agia inyakogo aser nüburtem melungjang koktetogo,” ta shia lir.
Kasa bangzüng nung, “Maneni terenlok alitsü aser mapatong tajungtem maneni inyaktsü asoshi 2019 küm nunga Modi lenisüba nung sorkar akümtsü atema tenangzükba agitsü asoshi BJP-i nüburtem ayongzüker,” ta shia lir.
Ajisüaka bangzüng nungji Ram tekülem ki, Article 370 aser Uniform Civil Code ama BJP indang tongtibang onüktem atemabo shia mali. Iba dak alia senden nung nashi tepsetba onüka süoka mejembi.
Osangbenertem den jembidang Union HRD Minister, Prakash Javadekar-i, tesüiba küm asem tsüngda BJP-i aniba NDA sorkari India linükji terenlok lenmang nung kanga karaa aniogo, ta ashi.
“Tang alimai India dak ranglokdar. Terenlok aliba limatem nungi tongtibang osangtem aser asadangtetbatem ajanga, India ya lenmang aika aliba linük ka lir ta ashir. Alima nung linük ajak den India tesendaktep junga kümogo. Shishilembaba, tesendaktep aser amalitep sabang nung India jenjang junga kümogo. Item temelenshi ya linük nung sorkar tashi tait ka aliba ajanga lir,” ta paisa ashi.