2019 küm party tashii arudang tajung anogotem arutsü: Rahul

New Delhi, January 11 (Agencies): Demonesitation onük nung sorkar aija tanü Congress lenir, Rahul Gandhi-i, iba telemtetba agiba atema tang mezüng alimai India Ato kilonser menütsüdar, ta ashi.
Demonetisation anema senden ka nung jembidang party tatong Tir, Rahul-i, 2019 küm Centre nung party tanaben tashii arudang “tajung anogotem” arutsü, ta ashi.
“Tang mezüng alimai Ato kilonser menütsüdar. Kodanga economist ajaki Ato kilonseri telemtetba tamajung ka agi ta mejembidang. Demonetisation ya pa kijai agiba telemtetba lir,” ta Rahul-i ashi.
Ato kilonser, Modi kübok linük rongsenkettsüng küm 16 tashi tesüleni atsüngzüka luogo ta shia Congress leniri gari ayokba kanga ajema akumba indang jembi.
BJP lenirtemi, Congress-i linük atema kecha meinyaktsü ta aitsüba meyipja Rahul-i, küm ana ser tesadang nung BJP-i RBI aser Judiciary alema inyakba amaji Congress-i küm 70 nunga meinyaktet, ta ashi.
Paisa, BJP, RSS aser Ato kilonser, Narendra Modi nungeri RBI, Judiciary aser Election Commission ama rejutem tashimeiti kümdaktsüogo, ta ashi.
“Onoki RBI nija tashi akhümtsübur. Ibaji linük rongsenkettsüng tajemdakdak lir aser tangbo ibaji menütsür. RSS aser BJP züngsemtemi shinga tangatetba magir,” ta pai ashi.