2019 küm tashi nungbo kibong ajak nem power agütsütsü: Goyal

New Delhi, December 11 (Agencies): Union Power Minister, Piyush Goyal-i, 2019 küm tashi nungbo kibong shia nem electricity agütsütsü atema sorkari inyakdar, ta ashi.
Tanü Rashtrapati Bhavan nung ‘Laureates & Leaders for Children Summit’ nung jembidang Minister-i, iba lima ya tanurtem atema tesem tajungba ka akumtsü atema alima lenirtemi longjemer inyaktsüla, ta ashi.
“Kibong shia nung electricity alitsü atema kechiba sustainable development goal atema 2030 küm tashi atatsü? Küm 14 ji mapang talangka, aser asen chirtem atema kanga tongtibang. Asenoki temelenshi ka atema inyaknüra, asenoki ibaji tangsa inyaktsüla,” ta Union Minister-i ashi.
“Modi sorkari 2022 küm tashi nung kibong shia nem electricity agütsütsü nangzükogo. Ajisüaka tanurtemi kasa maongka angutsü atema 2019 küm tashi nungbo kibong shia nem electricity agütsütsü atema ni inyakdar,” ta Goyal-i ashi.
“Tan putu nung iba ya tanurtem matsüngdang teinyaktsü sentsüh tila ka lir ama ni bilemer,” ta minister-i ashi.
Iba senden ya ajanga laureates & leaders 25 longjemdaktsüba atema tenüngsanga Goyal-i, alimai longjemer tanurtem mapa inyakdaktsüba,tanur shibelenba aser alar kümdaktsüba anema inyaktsü mapang tongogo, ta ashi.
“Asenoki alima dang; asen mapang nung tanurtem atema temelenshi kadaktsütsü asoshi asenoki longjemer inyakdi ta ashitsüla. Tanurtem atema asenok melongjemtetra, asenoki kecha atema-a melongjemtettsü,” ta paisa ashi.
Anogo ananübuba summit nung Nobel Peace Prize takok angurtem- Tawakkol Karman aser Leymah Gbowee na, taoba mapang Australia Ato kilonser, Julia Gillard aser Panama Tir kinüngtsü, Lorena Castillo nungeria tanurtem atema asen aliba lima ya tajungba küma yanglushitsü atema shisa lemsatepa liasü.