2019 Lok Sabha election tashi Amit Shah BJP Tir inyaktsü

New Delhi, Rongjui/September 08 (Agencies): 2019 küm Lok Sabha election tashi Amit Shah BJP Tir inyakdaktsütsü atema tanü Bharatiya Janata Party (BJP)-i organisational elections atsülangtsü atema telemtetba agiogo.
Tanü New Delhi nung anogo ananübuba National Executive senden tagidak mapang osangbenertem den jembidang West Bengal BJP Tir, Dilip Ghosh-i, “Organisational elections ya inyakyim kanga tulu aser mapang-a kanga agir. Iba election nung party nung inyaker ajaki shilem agir. Anungji 2019 Lok Sabha election tashi organisatiobnal election magii atatsü atema o lemtepdar,” ta metetdaktsü.
BJP party constitution nung temsüa alir züngsemi Tir ji kümsük ana (küm asemsem) inyaktsü akok.
Osang angazükba agi, Shah leniba nung office ketdangpurtem, state balala nungi BJP Tirtem aser General Secretary (Organisation) tem iba onük nung o lemtepogo aser bangzüng ka renema National Executive-i agizüktsü.
2016 küm Aenjeti/January ita nung Shah den tetokteper makai pa tanaben BJP National Tir shimshia liasü. Tamalen pai taoba Tir, Rajnath Singh kümsük benzüka liasü aser tanabenbuba kümsükji sangküm Aenjeti/January 26 nü tembangtsü.
2014 Lok Sabha election nung Shah ya Uttar Pradesh incharge liasü aser iba state nung BJP-i Lok Sabha menden 80 nungi menden 73 tashi nung takok ngua liasü.
BJP Tir inyaka alidang Rajnath Singh Home Minister akumba ajanga 2014 küm Chiteni/July ita nung Shah BJP Tir shim.
Office ketdangpurtem senden dak sendakba nung osangbenertem den jembidang BJP Secretary, Rahul Sinha-i Modi sorkari inyaktetbatem aser party tashi nung ajemdaker party-i 2019 election nung tokteptsü, ta ashi.
Paisa, “Opposition party temi nüburtem mashileni anitsü meranger, saka parnoki takok mangutsü. Onoki 2019 Lok Sabha election nung ano takok tuluba angutsü,” ta ashi.