2019 tashi nung Modi sorkari tenangzükba ajak inyaktsü: Amit

New Delhi, May 27 (Agencies): Modi’er sorkari lenla ajaklen teimla agütsüogo ta shia tanü BJP National Tir, Amit Shah-i, NDA sorkari küm ana nung tamendakdak junga yangertetogo aser 2019 küm Lok Sabha election matongdangsa parnoki nangzüka aliba ajak inyaktsü, ta metetdaktsü.
Amit-i, “Küm ana nung sorkari tamendakdak akanga yangluogo. Taruba küm asem nung terenlok junga agütsütsü. 2019 küm nisungtemi vote agütsüdangbo onoki nangzükba ajak inyaker alitsü, ta ni shiteter,” ta metetdaktsü.
Yangi osangbenertem senden ka nung sorkari küm ana nung inyaktetba sangdongdang Shah-i, party-i assembly election tem nung junga inyaktetogo, kechiyong Rohith Vemula soseta asüba aser JNU ken o ajanga kecha mesütet, aser item onük benokertem (Congress) tangbo makai kümogo, ta ashi.
Amit lenisüba kübok party-i assembly election tem nung toktepba dak sentakba nung pai, Centre sorkar yimsüsübaji nüburtemi agizüktetogo aser BJP-i tang mezüng state pongu nung sorkar kümogo, ta ashi.
Modi sorkari lenla ajunga nung nüburtem nem teimla agütsüogo ta shia pai, UPA sorkari küm 10 yimsüsüdang senpong tazüng toktsü, inyakyim raksa, ketdangsüba nung teimla samadaktsü aser teimla magütsü, ta ashi.
Asüng nungi tenzüka minister tem aser party office ketdangpurtemi akumba BJP telok 30-i tesem 200 dak tema sema sorkari inyaktetbatem sangdongtsü.
“UPA -i küm 10 yimsüsüba mapang ochimashi jenti liasü, iba sülen Modi sorkar tashii aru. Küm ana sorkar nung shingaia onok anema ochimashi tai tonglokja mali,” ta Shah-isa metetdaktsü.
Union Cabinet züngsemtem shimshitsü ta bulua jembiba osang dak sentakba nung Shah-i, iba dak sentakba telemtetba tesülen agitsü, ta ashi.
Assam Chief minister, Sarbananda Sonowal-i Union minister menden tazüng toktsüba atema nübo tasen shimtsü asü ta asüngdangba langzüdang Shah-i, “Ibaji inyaktsü, saka anogobo ano melemtet,” ta ashi.