2020 küm tashi nung arem shiruru shilem asem nung anasübo samadoktsü

Alima ajunga nung arem shiruru kanga ajema kümogo aser 1970 küm nungi arem shiruru noklang shilem nung 58% ajema kümogo aser yamai dang ora 2020 küm tashi nungjibo tang aliba dang nungi shilem asem nung shilem anabo arem shiruru samadoktsü ta tawa Zoological Society of London (ZSL) aser World Wildlife Fund (WWF) nungertemi asadangba osang ka ‘Living Planet Report’ ajanga metetdaktsüogo.
Talisa shirurutemji awatsüng, ayong aser septsülen alirtem wara tapu balala agi tonger süadoker aser ano meimchirtemi arem lepdoka yim tasen akümer, arem shiruru pua ayoker, tzü mopung menenba aser tsüngsang mopung balaka melentepba ajanga shiruruji asür aser tajemba akümer. Iba jagi küm nung noklang shilem nung ana agi ajema kümdaktsür ta ashir. Item ajakji parnoki alima balala nungi arem shiruru tapu balala 3,700 tashi bendena reprangba nungi bushitet.
‘Living Planet Report’ ta asüba ya küm ana nung ken adoker aser iba ajanga alima nung arem shiruru tapu balala bushizüngdanga bushia osang adoker.