2020 küm tashi nung India ya Hindu linük akümtsü: Singhal

New Delhi, July 18 (Agencies): Tanü Vishwa Hindu Parishad (VHP) patron, Ashok Singhal-i, 2014 küm Lok Sabha election nung BJP-i aniba teloktepi takok tulu anguba ya linük nung yimsoshiba ka lir aser 2020 küm tashi nungbo India ya Hindu linük ka akümtsü, ta ashi.
New Delhi nung sentong ka nung jembidang VHP lenir Singhal-i, “Ni Sai Baba Ashram nung aliba mapang Sai Baba-i kü dang, 2020 küm tashi nungbo linük rangben ya Hindu akümtsü aser 2030 küm tashi nungbo alima ajak ya Hindu asütsü ta ashi. Iba yimsoshiba ya tenzükogo ta ni bilemer,” ta ashi.
Tanü iba sentong nung External Affairs Minister Sushma Swaraj aser RSS nung tongti lenirtema denogo.
Narendra Modi’er sorkar tashii aruba tenüngsanga pai, iba takok ajanga küm 800 tashi alar süa aliba tatembang kati aruogo, ta ashi.
“Iba ya yimsoshiba tila ka masü. Iba ya India kija nung masütsü saka alima matsüngdang tangatetba tasen ka benoktsü,” ta Hindu leniri ashi.
Taoba RSS tongti aser yaküm asüsang, K S Sudarshan indang taküm otsü aser pa mapatem indang kaket tasen ka sayatsüba sentong nung pai item o jembia liasü.
Iba sentong nungsa Union Minister Swaraj-ia Sudarshan tenüng sanga, “Ni Sudarshan den sadok-sadoka jembitettsüsa pa dak yimya liasü. Nisung ka ajungbaji pa dak aketba yimya tajung ajanga asadangteter. Temulungjang nung tetsübu ka lira teinyakertem shingaia sadoka mejembitettsü,” ta ashi.
Iba sendong nungsa RSS lenir Bajrang Lal Gupta aser Sudarshan tenu KS Ramesh natia taoba mapang RSS lenir taküm otsü aser pa mapatem indang nüngsanga jembiogo.