2020 nungbo North Korea ket nung nuclear 45 kümer alitsü

Seoul, February 09 (Agencies) : 2020 küm tashi nungbo North Korea nunger ket nung nuclear arms 45 tashi kümer alitsü, ta Brihostibarnü South Korea nunger mongintemi ashi.
Pyongyang ket nung tang ‘highly enriched uranium’ seret 280 kg yua lir, ta Sejong Institute nung scientist Lee Sang-hyun-i ashiba osangbenertemi metetdaktsü.
“Iba den külemi North Korea ket nung tang aliba nuclear weapon 22 jagi 45 akümtsü akok,” ta pai aruyaa aliba küm asem atema asadangba nungi ngutetba metetdaktsü.
Par linük nung plutonium seret 50 shi lir, aser parnoki ibaji tarutsü kümtem nung timba küma amshitettsü tashi lir. Iba plutonium yagi atomic bomb tem yanglur, ta Lee-isa ashi.
2013 küm Pyongyang nung Yongbyon nuclear research centre ka tanaben lapokshiba aser iba centre nung tapoktsü tesashitem yangluba dak ajemdaker Lee-i iba asangdangba agia liasü.
Iba centre ajanga plutonium timba küma yanglutsü — küm nung seret 6 — aser uranium-a küm nung seret 80 bendena yutettsü.
September 2016 nung Kim Jong-un-i nuclear tendangba mapang uranium amshi aser ibaji amshiba ajanga tarutsü mapangtem nung nuclear oset yanglutsü tashi ita aliba sayur, ta Lee-i ashi.
North Korea-i 2006, 2009, 2013 aser September 2016 nung tendangba sülen ano taküm January ita nunga nuclear ka tendangogo.