2020 tashi nung ISIS-i aginüba linük rongnung India densema lir

London, August 10 (Agencies): Taruba küm pongu (2020) tashi nungbo Islamic State (IS) kiralongrar teloki alima shilem tulu ka aginer, aser iba nungji Indian subcontinent densema lir, ta kaket tasen ka nungi map ajanga sayur.

Iba map apir, taruba küm pongu tsüngda Islamic State of Iraq and Syria (ISIS)-i Middle East, North Africa, Indian subcontinent shilem tuluba ka, Europe shilem kar parnok yimsüsüba (caliphate) küboki aittsü nükjidong lir.

IS indang Sharia ozüng ajanga yimsüsüba, caliphate ajanga anüolen Spain nungi anüdoklen China tashi parnok tashi kübok yuner, ta IS map ji apir Mirror osang ajanga metetdaktsü.

Map nungji Spain, Portugal aser France tesemtem nem Arabic oshi agi ‘Andalus’ ta nüngja agüja lir aser Indian subcontinent nem ‘Khurasan’ nüngja agüja lir.

ISIS züngsem 50,000 lir aser parnok ket nung sen aser oset pound sen billion 2 shi jenjang lir. Parnok rongsenji Iraq aser Syria na nung totzü aser gas ajanga lir.

“Parnoki Islamic lima ta bilemba ajakji aginer. Parnoki caliphate yimsüsüba amenokba sülen tanüngba lima anema apusoner. Parnoki alima ajak ya parnok kübok yuner,” ta BBC reporter Andrew Hosken-i ashi.

“Parnok anema linük 60 lir, aser iba nungji United States aser Russia densema lir, anungji ibaji mataloktsüa akok. Aji süka parnok indang mezüng merajibo ataloktsüa akok,:” ta paisa ashi.