2021 sülen Himanta Biswa-i Assam politics nung shilem magitsü

Guwahati, January 24 (Agencies): Assam nung BJP lennir tejen aser Health, Finance & PWD Minister, Dr Himanta Biswa Sharma-i 2021 sülen pa Assam yimtenren mapa nung shilem magitsü ta metetdaktsü.
Tanü Sarusajai National Games stadium nung BJP party rally ka alidang Sarma-i iba osang metetdaktsü.
Nisung aikati Citizenship (Amendment) Bill, 2016 atema ashishitepaka Sarma-i bo iba Bill posema nungiter.
“BJP-i Assam nunger taginüba anema meinyaktsü. Citizenship (Amendment) Bill aser Assam Accord nung Clause 6 ajanga Assam nung lisopurtem kümzüka ayutsü” ta tanü pai ashi.
Assam nung shisahir kari Citizenship (Amendment) Bill anema lungkak aitba nungbo shilem agir saka Assam nung ‘Satras’ atsünga agidangbo ola madok. Nagaon district kübok Jamunamukh nung arishi küm 50 tain tetsür ka dak tashiyim agi shi nung medemdanga parnoki ola madok, ta Sarma-i aitsü.
Citizenship Amendment Bill anema noktakertemi BJP party aser züngsemtem anema o tamajung jembiba atema paisa mepelaba olen ka shisem.
“Bill anema noktakba tenüng nung artsütepba indang tetoktepba ka alir ama lir” ta pai ashi.
Himanta Biswa Sarma aser Chief Minister Sarbananda Sonowal dang jashir ta sayua nübortemi tena dang wako tanaktem ayiploktsüogo.
Taoba Assam chief minister aser Congress lennir tejen Tarun Gogoi-i Himanta Biswa Sarma dang ‘Hindu Jinnah’ ta jaloktsü aser pai Assam nung Hindu-Muslim meputep adokdaktsütsü meranger ta tai tongloktsü.