2022 CWG nung India-i shilem magitsüla: Raninder Singh

New Delhi, Rongchii 18 (Agencies): National Rifle Association of India (NRAI) tir Raninder Singh-i ashiba agi, 2022 Commonwealth Games, Birmingham nung asayatsü aliba nung shooting asaya mebenokra India nungeri shilem magitsüla.
Raninder-i ashiba agi, iba dak sendakba nung pai yakta Sports Ministry aser Indian Olympic Association (IOA) dangi shidi ka zülutsü.
India nung shooter tem nem tetushi agütsüba sentong nung NRAI tekolakba-i ashiba agi, “anogo ka ana tsüngda nung ni Union Sports Minister Rajyavardhan Singh Rathore aser Indian Olympic Association (IOA) dangi 2022 CWG nung shooting asaya mebenokra iba asayamung nung shilem magitsüba atema asüngdanga zülutsü.”
Tawa tembangba Gold Coast, Commonwealth Games nung India nunger shooter temi gold medal 7 densema medal 16 koktetogo.
CGF puri 2022 Games nung shooting masayatsü asoshi telemtetba agiogo.
Iba küm tetenzüklen 2022 Games organizers dangi shidi ka nung CGF CEO David Grevemberg-i yamai shia liasü: “2022 CWG nung shooting masayatsü aser CGF-i iba sentong ya mulunga pusemogo.”
Ajisüaka Grevemberg-i ashiba agi, iba asaya ya khenyongibo mindok aser CWG ayongzükba linüki iba asaya benoka asayanera asayatettsü.
Rathore-i CGF dangi 2022 CWG nung iba asaya ya maneni benoka asayatsü asoshi mepeshia züluogo.
Taküm Aenjeti (January) nung CGF puri Birmingham Games nungi shooting agintsüba atema local organizing committee-i telemtetba agiba pusemogo.
Raninder-isa ashiba agi, iba asaya ya benoka asayatsü asoshi lenmang ka bushitettsü atema NRAI pur International Shooting Sport Federation (ISSF), Commonwealth Games Federation (CGF) aser Birmingham Games organising committee den maneni sensaksema arudar.