2022 küm tashi nungbo Kashmir, Maoists tebilemtsü koktettsü: Rajnath

New Delhi, August 19 (Agencies): Union Home Minister, Rajnath Singh-i, 2022 küm tashi nungbo Kashmir tebilemtsü, kiralongrar tebilemtsü, Maoists aser North East nung telungpur tebilemtsü malitsü, ta metetdaktsü.
“Kiralongra, Maoists mesüra Kashmir ama tebilemtsü aika lir. Item ama tebilemtsü atema kangabo jembitsü madoker. Ajisüaka ni züngbong ya ashir- 2022 küm tashi nungbo onoki India tasen ka yangertsü. Anungji 2022 küm matongdangsa onoki item tebilemtsü atema lenmang angutsü,” ta Rajnath-i ashi.
New Delhi nung ‘Sankalp se Siddhi – New India Movement (2017-2022) Naye Bharat kaa nirmaan’ sentong nung jembidang pai, “1942 küm nüburtemi tezüngzüktep ka (Quit India) agia 1947 küm nüchiso nguogo, süra nüchiso ngur küm 70 nunga India-i pei peritsüsa meliteter,” ta ashi.
“India nunger nüchiso ngur küm 75 ajungba küm nungbo India tasen ka yangertsü atema tenangzükba agiba atema ni Ato kilonser, Narendra Modi nem tenüngsang agütsür,” ta ashi.
“Quit India Movement tenzüker küm pongu nung India-i nüchiso ngutet süra, 2017 küm tenangzükba agiba ajanga asenokia 2022 küm tashi nungbo India tasen ka yangertettsü,” ta Union Minister-isa ashi.
“India tasenba nungji sensak tia mesüra azüng-zülu memeteter malitsü, nisung ajak talidak ki alitsü aser mozü maliba ajanga shinga masütsü. Alima sabang nunga India ya tashi tulu aliba linük ka akumtsü,” ta paisa metetdaktsü.
Ochimashi dak sendakba nung Rajnath-i, “Union Cabinet mezüngbuba senden nung onoki ochimashi anema raratsü nangzüka liasü,” ta shisem.