2022 küm tashi nungbo ochimashi malitsü: Niti Aayog

New Delhi, November 04 (Agencies): Niti Aayog-i 2022 küm tashi nungbo India tasen ka yangerteter alitsü, kong sensak tia, ochimashi, tesempa, kiralongra aser lokti tsüngda tesempatep malitsü, ta ashi.
Taoba ita Conference of Governors mapang nung Niti Aayog Vice Chairman, Rajiv Kumar-i New India @2022 document metetdakja liasü, aser iba document ajanga ashiba agi, tang nungi tenzüka 2047 küm tashi India rongsenkettsüng ainba shilem 8 süra alima nung rongsenkettsüng jenjang tajungtiba linük asem nung India densemtsü.
Iba document ajangsa, Pradhan Mantri Gram Sadak Yojana (PMGSY) ajanga 2019 küm tashi nungbo sorkari yimtsüng ajak gari lenmang agi sendakteptettsü, ta ashi.
Iba document ajanga ashiba agi, 2022 küm tashi nungbo India nung world class higher education institutions 20 alitsü.
Pradhan Mantri Adarsh Gram Yojana (PMAGY) kübok shima aliba yim ajak 2022 küm tashi nungbo model village jenjang angutsü, aser 2022 küm tashi nungbo India nung sensak tia malitsü atema inyaktsüla, ta document nungsa shia lir.