2025 küm India-Russia na shishilembaba sen billion 30 ajungtsü: Putin

New Delhi, Mongputeni/October 05, 2018: Tanü New Delhi nung Russia aser India na tsüngda India-i US sen billion 5 agi Russia nunger S-400 air defense system 5 alitsü atema tezüngzüktep agiba sülen Russia Tir, Vladimir Putin-i jembiba noksa nung angur. Kasa noksa nung India Ato kilonser, Narendra Modi-a angur. 

New Delhi, Mongputeni/October 05 (Agencies): Tanü Russia Tir, Vladimir Putin-i, 2025 küm tashi nungbo India aser Russia na tsüngda shishilembaba US sen billion 30 billion ajungtsü imlar, ta ashi.
Ano Ato kilonser, Narendra Modi-ia Russia dang India linük nung defence industrial park ka amenoktsü asüngdang.
Modi-i, linük ana tsüngda shishilembaba aintsü atema linüktemi new & renewable energy, nuclear technology aser defence atema inyaktsü nüngdak, ta ashi.
Tanü New Delhi nung India-Russia Business Summit nung jembidang Russia Tiri, India den business tesendaktep ayutsü atema parnoki kanga tongti süa inyaker, ta ashi.
“Linük ana tsüngda shishilembaba kanga indar. 2017 küm shilem 21 küma US sen billion 9.36 liasü. Taküm Aenjeti nungi Chiteni ita tashi nung shilem 20 küma US sen billion 6 ajung. Maneni onoki US sen billion 10 aser iba dak talia tongdaktsüner,” ta Putin-i Russia oshi nung ashi, aser ibaji English oshi agi meyipja liasü.
Putin-isa, “Onoki asenok tsüngda shishilembabaji 2025 küm tashi nungbo US sen billion 30 jungdaktsüner, aser linük anaprong shia investments US sen billion 15 kümdaktsüner, aser ibaji linük ana tsüngda industrial tsütsü amalitepa inyak nungang akoktsü,” ta ashi.
Ato kilonser, Modi-i tesüiba küm ana tsüngda linük ana tsüngda shishilembaba jenjang kanga junga kümogo, ta ashi.
“Onok rongsenkettsüng aser loktiliba terenlok atema onoki Russia ji kanga tongtibang partner ka ama züngshir. Asen tesendaktep ya sector ajak nung indar,” ta Modi-i ashi.
“Tesüiba küm ishika tsüngda state tem nung shishilembaba tezübaba akumtsü atema mapa aika inyakogo aser state tem tsüngda tajunglen agi tokteptsü atema ajungshia aruogo. Iba dak sendakba nung onoki Russia nunger provinces aser India kübok state tem tsüngda shisa lemsatepner,” ta Modi-i ashi.
“Nuclear energy tsütsü India aser Russia na ya tembar ama züngshir. Technology ayokba mesüra aliba dak alia asenoki Make in India programme kübok technology aintsü atema India nung longjemer inyaktettsü. Defence tsütsü asenoki partnership tejakleni bener otettsü aser India nung osettem yanglutettsü,” ta paisa ashi.
Modi-i, India nunger IT aser pharmaceutical company temi Russia nunger company tem den senteper Russia nung inyaktsü maongka liasü, ta shisem.