2029 nungi nisung danga Robot tem teyakyakba akümtsü:HP CTO

Chicago,September 13 (Agencies) : Robot temi nisung tem dang nungi terajemba akümtsü ta scientist temi jembia aruba to joko mapa küma aotsü mapang tongdar, ta HP Inc nung scientist tongti kati ashi.
Artificial intelligence (AI) renlokba aser machine ajanga angazükba maparen kanga kara aoer aser scientist temi ‘singularity’ ji 2040 nungiang ataloktsü aliba 2029 nung mapa akümtsü aser ibaji ajanga küm 11 tashi kümzüker, ta company indang kechisarena tasen yanglutetba tiyong, HP Labs tem nung tang tekolak aser HP nung Chief Technology Officer, Shane Wall-i ashi.
Chicago HP Reinvent Partner Forum nung jembidang, Wb. Wall-i, nisung karibo iba ya ataloktsü asoshi tera tsübua mesüra arendaka repranga ataa alitsü akok, ajisüaka kechisarena yanglutetba, anema aliyim aser tanga inyakyim ajaklen kümzüka alitsü asoshi sentong shitak yanglua lira nisung ajak asoshi tajung bener arutsütsü, ta ashi.
Pai ashiba agi, AI-i data aika handle süteter aser telemtetba agitsü asoshi pattern tem discern süteter.
Pai, “Machine learning amshiba, AI aser data tulu amshia angazükba inyakyimtem ajanga nisung shingaia mangubatem angutsü,” ta ashi.
Pa ashiba agi, oset jenti yanglutsü asoshi tang yongi data farm tulu aika tenzüka lir aser bushisüngdangtsü asoshi labs aser company tem peria lir. Item tesemtem nung machine tem dang parnok meküta aliba osettem timtema ayutsü asoshi data sayur.
Wb. Wall, shiba küm 10 tejakdang HP nung züngsema aküm, pai company indang technology nükla anir aser teyanglutetba tasen putitetba nung pa shisatsü ajanga len anir.
Paisa ashiba agi, machine temi system ka nung teraksa alutsü aliba jilia metetdaktsütsüsa teyakyak kümogo aser 3D yanglutetba ajanga kechisarena yangluba nung temelenshi tulu bener arutsü.
“3D printing ajanga joko oset ta, tamshitsü tasak aika kanga junga azüoka inyaker aser tarutsü mapangtem nung iba ya ajanga menokdangtetba temelenshi bener arutsütsü,” ta Wb. Wall-isa ashi.
Tang yangluteta aliba osettem timba ka oset yanglutsü asoshi nüngdakba raw materials tesem ka nungi ka tashi melenshia, parts aser design asüba alima tesem balalai yoka yanglutetbatem lir.
“Kodang machine tem ajanga print mesüra system rangben manufacture süteterdir, oset belenshiarba ajema akümtsü. Tang aliba Machine tem ajanga parnok indang parts parnok sasa yanglur aser asüng lima nungbo, iba inyakyim ya kanga agi tebentetba akümtsü,” ta HP executive jagi ashi.
Pai, küm 30 tejankdangbo noksa agiba ya roll film nungsa agirang metenzüktsü agütsü aser noksaji anogo ishika tsüngdasa angu, ta iba temelenshi indang onük yarisemtsü asoshi bena arua ashi.
“Tanü asüngbo iba roll film joko kecha nunga mangur. Iba mesükba maparen ka alima nung ano ataloktsü,” ta Wb. Wall-i ashi.
AI ajanga DNA yanglushiba mapa inyaktettsü aser ibaji ajanga tashidak tem anepaluba nung yaritsü indang Wb. Wall-i tatishitsü ka shiogo.
“Technology ya mapa tajung aser tamajung ajak asoshi amshitetsü, ajisüaka pei sasa pei kümzüka alitsü temetettsütem ajak jangtsüla aser model tasen ka koma ser lendong meküti yanglutsü ibaji tama metettsüla,” ta pai ashi.