2030 nungibo mopung tashi amshia, alima nem electricity agütsütsü

New Delhi, October 18 (Agencies): Tarutsü mapang, 2030 küm nungibo alima shilem 5 nung shilem 1 nembo mopung tashi amshia, electricity agütsütsü akok ta Global Wind Energy Council (GWEC)-i bushitetba osang ka metetdaktsüogo.
Par teloki alima tensa kanga junga tendangba sülen 2030 küm nungibo alimai nüngdakba electricity noklang nung shilem 20 tashi mopung tashi ajanga angutsü ta bushitet.
“2030 küm tashi nung mopung tashi Gigawatts (GW) 2,110 shi akümtsü akok aser iba jagi alimai nüngdakba electricity noklang nung shilem 20 shi peridaktsüba den, meimchir nisung million 2.4 nem mapa agütsütsü aser carbondioxide miim tangoa küm nung ton 3.3 agi tejemba akümtsü. Mopung tashi amshiba ajanga rongsen tajangzüka, Euro sen billion 200 shi angutsü,” ta GWEC-i osang jangjashitsü.
“Alima tashi abenba linük lenirtemi France yimtiba, Paris nung alima tali tatsükba akümbaren azüokba ajanga alima tsüngsang mopung balaka küma melenshibaren azüoktsü tenangzükba agiogo aser parnoki nangzükba ama asangsang nung inyakba ajanga 2050 küm tashi nungbo alima nung carbon madenba electricity angutsü aser iba alizüng ajangzükba tsütsü  mopung tashi amshiba agi tongti shilem agitsü,” ta GWEC Secretary General, Steve Sawyer-i ashi.
2014 küm bushitetba den noklang nung shilem 17 agi timba küma, yaküm, 2015 küm tashi nung alima ajunga nung mopung tashi amshibaren GW 433 aliba osang bushitetogo aser taküm, 2016 küm tatemlen tashi nung mopung tashi amshibarenji maneni GW 60 akümtsü alizüng lir.
“Alima maneni terenlok lidaktsütsüsa mopung tashi amshitsü shishilembabaren Africa, Asia aser Latin America nung kanga kara aienba osang bushiteta lir,” ta GWEC-isa metetdaktsü.
India linüka 2030 küm tashi nungbo alima memenentsüba tashi amshiba tsütsü noklang nung shilem 40 agi timba kümdaktsütsü tenangzükba ka metetdakja lir.
Alima ajunga nung mopung tashi timtiba amshiba linük tarensen nung India 4 buba aser anü tashi timtiba amshir alima linük 10 rong nung India linüka densema lir.