2030 tashi nung ‘Ita yimtsüng’ ka tentettsü: ESA

Melbourne, January 05 (Agencies): Tarutsü mapang, 2030 tashi nung ita nung nisung alidak ka tentettsü alizüng ayuba osang ka European Space Agency (ESA)-i sangoktsüogo.
3D printers teyari agia tentettsü renemba ‘Ita yimtsüng’ asangsang nung tentetba ajanga meimchiri anünglak den sentakba osangtsüsang bushitsüren nung tajangzük tulu angutsü ta ESA lenirtemi metetdaktsüogo.
Parnoki ashiba agi, robot-tem mezüng ita-i yoktsü aser parnoki ‘Ita yimtsüng’ tentettsü maparen tenzüktsütsü.
“‘Ita yimtsüng’ tentetba sülen anünglak senzürtemi yimtsüngji tesep ama amshia anünglak den sentakba osangtsüsang agitettsü,” ta parnoki shisem.
“Ita nung nisung alidak asangsang nung tentetra, Mars bushia aor anünglak senzürtem asoshi tajangzük tulu asütsü,” ta National Aeronautics & Space Administration (NASA) nung inyaker, Kathy Laurini-ia metetdaktsüogo.