2041 nungi Bangladesh nung tanur kibong akümba anendaktsütsü:PM

Dhaka, September 26 (Agencies): Bangladesh Ato Kilonser Sheikh Hasina-i 2041 nungi linük nung tanur asüdang yongi kibong akümba (child marriage) anendaktsütsü nangzükogo, ta Honibar nü media ajanga metetdaktsü.
Hasina-i, “Kaketreju tem nunga tebur dang nungi tetsür timba lir,” ta Hokolbar nü la Columbia University, US nung o jembiba mapang ashi.
Lai linük nung tetsür temeten asoshi mapa jenti inyakba süa arua jembia liasü, ta bdnews24 ajanga metetdaktsü.
“Ozü linük nung tanur asüdang yongi kibong kümdaktsüba 2041 küm nungibo anendaktsütsü ni nangzüker. Iba ya ataloktsü asoshi onoki mera karbo agiogo,” ta lai ashi.
Hasina ya dang US nung UN General Assembly nung tetendak lir aser Hokolbar nü Columbia University nung ‘World Leaders Forum’ senden ka akadang lai “Girls lead the way” onük nung ajemdaker o jembia liasü.
Bangladesh nung tanur asüdang yongi kibong kümdaktsübaji alima ajak dang timba lir. Iba jagi linük nung tetsür asemsü lemer anasübo tanur asüdang nungi kinüngtsü ka ama kümdaktsür.