2050 küm nungi tzüyim nung ango dang nungibo ‘plastics’ tEimba asütsü: WEF

Alima nung meimchirtemi tang aliba yimya nung dang ali nungbo 2050 küm tashi nungjibo tzüyim nung ango dang nungibo ‘Plastics’ teimba asütsü ta World Economic Forum (WEF) ajanga January 21, 2015 nü sangdongogo.
Iba mapa ya Ellen MacArthur Foundation aser WEF na senteper McKinsey & Company teyari ajanga asadangogo.
Küm shia plastics tones million 8 tzüyim nung indoker aser ibaji asadangra minute shia Truck gari ka sünga jana inoktsür den kasa lir ta WEF osanga ajanga metetdaktsüogo. Tang tzüyim nung plastics jana tonnes 150 million shi lir ta ashir.
Taoba küm 50 tejaklen jana indokba dang nungibo taruba küm 20 nung anasü agi teimba asütsü. Asenoki plastics ya khen dang amshirbo indoker aser iba jagi noklang shilem nung 95 takoksa aludaktsür aser iba asadangra küm nung billon dollars 80-120 tashi akoksar. Anungji, asenoki plastics amshiyim yimya ya tera melenshia amshitsü mera tasen agitsüla iba jagi tzüyim nung jana ajema akümtsü.
Environment Protection Act, 1986 kübok ajemdaker India linük ajunga nung shishidang amshiba polythene bags mamshitsü lateta lir. Mezüngbuba Sikkim state nung ‘plastic bag-free’ takok ngua odagi aser Gujarat state nunga plastic mamshitsü ozüng agüja lir. Ano Uttar Pradesh state ajunga nung plastics meshishia mamshitsü ozüng agiyonga odagi.
World Economic Forum (WEF) ya 1971 küm Geneva, Switzerland headquarter  sür tentet.