20buba IDF C’ship: Phek o Peren na semi-final tongogo

January 30, 2019 anogo IG Stadium Kohima nung 20buba Inter District Football Championship nung Phek district aser Wokha district tsüngta Quarter-finals mezüngbuba asayaba noksa nung angur.

Kohima, Aenjeti/January 30 (TYO): Kohima, IG Stadium nung Department of Youth Resources & Sports-i ayonga tesayadak aliba 20buba Inter District Football Championship (Dr T Ao Trophy) asayamung nung Football Association Phek District aser Peren District Football Association nati January 30, 2019 nü pei tata asaya nung takok ngua semi-finals tongtetta liasü.
Mezüng asaya quarter-final nung, club balala nungi longema shilem agiba telok Phek-i Wokha District Football Association madak goal 5 agi tsükdaktsü.
Asaya tenzüker minute 6buba nung Phek nungi asayar Lavoriyi-i mezüng goal idaktsübaji dang masü saka asayar ka yirua mapang talila apuloktsür first half asaya tsüngda tashi nung paisa goal tanabuba idakja liasü. Tia makai, minute 16 buba nung Roziba Y-i asaya dak mapet yimya benshiba ajanga pa nem red card agutsü koba ajanga telok ka nungi asayar 10 dang küma liasü.
Lemon break sülen, asaya tenzükli minute ka tsüngda nung Phek nungi asayar Punuru-i goal tasembuba idaktsü. Kopi meli, minute 47 aser 49 buba nung Phek nungi asayar Rhitsho Mero-i goal pezübuba aser Khwetekhi Thopi-i par telok atema goal pungububa idakja takok ngua asaya tembang.
Kasa asayamung quarter final asaya tanabuba nung, Peren DFA-i Kiphire District Sports Council madak goal 7 agi tsükdaktsüogo.
Asaya tenzüker mezüng half tashi nung Peren nungi asyar Khangkinwibo Pamay aser Suolhiampou Kamei nati minute 6 aser 17 buba nung goal ka ka idakja Peren goal ana agi tejakdang kümadok.
Lemon break sülen, asaya tenzükli, Peren DFA atema Emsolung-i goal tasembuba idakja liasü. Maneni, Ratobe N. Poireng-i minute 50 aser 73buba nung goal ana idakja par telok goal 5 agi tejakdang liasü. Tatsüka dang lir, minute 77buba nung Nampibo-i goal 6buba aser asaya atemtsü anasa minute 80buba nung Zumzum-i goal 7buba idakja liasü.
January 31, 2019 nü atema Quarter-final asaya yamai alitsü:
*Mokokchung DFA vs Zunheboto DFA @ anepdang 10:00 ako
*Kohima DFA vs Tuensang DFA @ nikongdang 1:00 ako