21 buba Classic Cup asayamong tenzükogo; Headwinds FC-i goal 3-2 agi Kohima Royal Kickers akok

21 buba Classic Cup asayamong tenzükba asaya nung shilem agir, Headwinds FC aser Kohima Royal Kickers asayartemi Nagaland Football Association (NFA) nung Tir, P. Atuo Mezhür aser Classic Club ketdangsertem den agiba arok noksa ka yangi angur. (Dimapur, November 03)

Dimapur, November 03 (TYO): Mapang talang ka nungi yongyaba 21 buba Classic Cup football asayamong Kohima nung tanü Mongolbar nü tenzükogo.
“Nagaland nung saisapongtsü den sentakba ki o jen peria maliba atema sasar. Naga nunger ajungai football asaya kanga meimer saka saisapongtsü ki o jen peria maliba yong football asaya ya tangalen ama asen state nung maiener,” ta asayamong tenzükba sentong nung tongti tesemdanger, Nagaland Football Association (NFA) nung Tir, P. Atuo Mezhür-i temulung shiranga ashi.
“Sempet tajung akaba asayartem indang jenjang tajungba kümdakja parnoki national aser international sabang nung tangar den toktepa shilem agitettsüsa tarutsü mapang nung saisapongtsü ki o jen peria asen Nagaland nunga renemtsü imlar,” ta shia, state sorkari saisapongtsü ki o jen peria renemtsütsü tajungshiba olen ka pai metetdaktsü.
Küm 21 tejaklen nungi tenzüka Classic Club Kohima (CCK) teloki iba Classic Cup takok ngua ayongba atema tayonger dang pelaba olen ka lemsatepba den külemi, lanurtem jenjang tajungba kümdaktsütsü atema tesüiba mapang football asayartemi coach aser referee mapa inyaktsü tajungshiba olen ka tongti tesemdangeri tanü sangoktsü.
Ano, sangküm, 2016 küm India nung asayatsü ayongba U-17 FIFA World Cup nung India telok tenüng nung shilem agitsü shimba asayar rong nung densemdaktsütsü asoshi Under-17 asayar 33 tashi shima parnok nem terenemshiba agütsüba sülen maneni North East jenjang nung agitsü ayongba asayar shimtsü sentong nung shilem agidaktsütsü tetuyuba ka Indian Football Association (IFA)-i NFA nem agütsüba olen ka pai metetdaktsü.
“Aji oda, IFA-i tuyuba ama, NFA-i asayartemji shima parnok tang Kohima kübok Sports Academy nung terenemshiba tagidak lir,” ta pai osang jangjashitsü.
Tan asayamong nung kangasa junga shilem agir asayar 3 tashi shima parnok India-i anir oa idakji asayatsü terenemshiba agütsütsü sentong renemba osang ka CCK Tir, K. Neibou Sekhose-ia tanü sentong nung metetdaktsü.
Tanü asayamong tenzükba asaya nung Headwinds Football Club teloki goal 3-2 agi Kohima Royal Kickers telok akok.
Headwinds asayar, Kikrukhrielie-i asaya tenzüker minute 4 aser 13 buba na nung goal 2 agütsü saka Kekhriesilie Meyase-ia minute 18 aser 21 buba na nung par Royal telok asoshi goal 2 agüja telok anaprongla kasa jenjang kümdaktsü.
Ajisüaka, asaya tanabuba shilem tenzüker minute 6 buba nung Vilazolie Rio-i goal 1 agütsüba yong par Headwinds teloki tanü asayaji kokadok.
November 4 nü asaya yamai alitsü:
Roaster Club vs Vanguard FC @ 10am
Bhaiyo’s FC vs Dejavu DC  @ 11:40 am
Fraternity FC vs Fennce FC  @ 1:30pm