21 buba Classic Cup nung telok 31-i shilem agitsü

Dimapur, November 02 (TYO): Classic Club Kohima (CCK) teloki tan November 3-20 nü tashi Kohima nung asayatsü ayongba 21 buba Classic Cup 2015 asayamong nung telok 31-i shilem agitsü renema lir.
Iba football asayamong nung mezüngbuba aser tanabuba jenjang anguba telok 2 nem takok marok aser senpet sen lakh 50 aser 80,000 agütsütsü renemba den külemi, individual shilem nunga sen lakh 2 shi jenjang sempet agütsütsü renemba osang jangjaogo.
Yaküm asayaba 20 buba Classic Cup asayamong nung champions, Barack Football Club-i tan asayamong nung shilem agitsü renema lir.
Par teloki 2014 küma takok marok agizükba den külemi, 2012 küm ayongba asayamong nunga tanabuba jenjang angu.
Ano, 1 buba aser 4 buba Classic Cup asayamong takok marok agizükba telok, New Market-ia tan agi 20 ben buba atema iba asayamong nung shilem agitsü renemba osang jangjaogo.
2012 küm shilem magitettsüsa aküma New Market teloki 2004, 2006, 2010 aser 2011 nung tanabuba jenjang anguba den külemi, 1995-2011 tashi densema 17 ben tashi iba asayamong nung atonga shilem agiba otsü yanglua lir.
Ano, yaküm semifinalst, IGAR(N) aser Headhunters telok na den külemi, telok tasen ishikati iba asayamong nung shilem agitsü terenemshiba agia lir.
Asüng, Mongolbar nikongtsütsü 1:00 ako nungi tenzüka asayamong tenzükba sentong agiba sülen Headwings FC aser Kohima Royal Kickers telok na tsüngda mezüngbuba asaya asayatsü renema lir.
Asayamong tenzükba sentong nung Nagaland Football Association (NFA) Tir, P. Atuo Mezhur tongti tesemdanger alitsü.