21 Tuli A/C nung Independent party aser NPF Party longjemogo

Dimapur, November 8 (TYO) : 21 Tuli A/C Independent party, 21 Tuli A/C NPF Party den longjema oa atenba sentong ka kanga takok ngua agia liasu ta Wb. I. Olem Lkr, 21 Tuli A/C NPF party tiri sangdong ka ajanga metetdaktsu.
Iba senden nung Mokokchung Division Tir Wb. Moasangba Jamir tongti O jembir liasü. Iba den külemi Independent telok tenüng nung Wb. T. Lima Ltr, taoba President Independent Party-i o jembi.
“Iba sentong takok tulu ngua agitetba asoshi Mokokchung Division nung tir-i anir party nung tanishirtem dang kanga pelar. Iba den külemi Parl Secy (I&C) Wb. Amenba Yaden, pa shisatsü, nübo, rongsen agi yaritepba ajanga iba sentong asangsang nung takok tulu nguogo aser iba atema pa dang kanga pelar” ta 21 Tuli A/C NPF party tiri metetdaktsü.
Party ana longjemba temaitsü, tsünglanglen pangzüng ya telok anapronglai teka mekanga agizüka ayu.
1) NPF Party temzüng ozüng pangtak kübok tashi anga anidaka aotsü, tanü 7th Nov, 2015 anogo NPF Party 21 Tuli A/C aser independent party Tuli A/C ka küma longjema agizüka ayur.
2) Iba party ana longjemba ajanga Dr. Shurhozelie, President NPF, Nagaland aser Shri T.R. Zeliang Hon’ble Chief Minister, Nagaland nunger-i aniba Government tali tashi itdaktsütsü asoshi Shri. Nuklutoshi, Hon’ble Minister, Mokokchung Division Incharge aser Shri. Moasangba Jamir, President NPF party, Mokokchung Division lenisüba nung NPF Party Mokokchung Division tali tashi taitba küma nungita yaritsü lemtet.