22 buba Classic Cup: Boys, Adroit & Hunters teloki takok angu

Kohima nung tasayadak 22 buba Classic Cup asayamong nung Head Hunters aser Radiant FC asayartemi toktepa shilem agiba noksa nung angur. (Kohima, November 12)

Kohima, November 12 (TYO): Boys Football Club, Adroit Boys Sechü Zubza aser Head Hunters teloktemi takok ngua, tang tasayadak 22 buba Classic Cup football asayamong anogo tasembuba nung, tanü Honibar nü shilem agiogo.
Tanü tasembuba asaya nung Hunters teloki goal 12-0 agi Radiant FC telok madak ajemshia akok.
T. Khampei Konyak-i asaya tenzüker minute 9 buba nung tetenzükba goal agütsüba sülen minute 2 süir par Hunters telok asoshi 2 buba goal agütsü.
Pai maneni minute 22, 31, 39, 44 aser 50 buba nung goal 5 tashi agütsüba sülen tan asayamong asaya ka nung hat-trick anaben tashi yanglur asayar küma, asayamong otsü tasen yanglua liasü.
Külem asayar, Hadtinnang-i minute 16 aser 21 buba nung goal 2 aser Chingkhumlumg-ia minute 37 aser 48 buba nung goal 2 agüja par telok maneni temaba jenjang nung ajungkettsüba sülen Kevi-i minute 49 buba nung 12 buba aser takokba goal agüja, par Hunters telok nem takok ngudaktsü.
Boys aser Rising Star Meriema na tsüngda asayaba mezüngbuba asaya goal 1-1 draw nung tembangtsüsa jenjang ajuruba sülen Boys teloki sudden death yimya nung par asaya koka liasü.
Kevingulie-i minute 12 buba nung par Meriema telok asoshi aser Khriengulie-i asaya mezüngbuba shilem tembangtsü minute 1 anünga alidang par Boys telok asoshi goal agütsü.
Tanü tanabuba asaya nung Adroit telokia goal 1-0 agi Ziekezou Sporting Club telok tsükdaktsü.
November 14 nü asaya yamai alitsü:
1. Naga FC vs Unity FC @ 9:00am
2. FC Kitsubozou vs Intimidators @ 10:30 am
3. Calvary Baptist Church vs MT Youth Club @ 12:00pm
4. Football Club Royals vs Fraternity FC @ 1:30pm