22 buba Classic Cup tenzükogo; Elite FC-i PWDYO akok

22 buba Classic Club football asayamong tetenzükba asaya nung shilem agiba jakdang Elite FC aser PWDYO asayartemi KPC Tir, Xavier Rutsa aser Classic Club ketdangsertem den aroki Kohima kübok Kohima Local Ground nung agiba noksa ka yangi angur. (Kohima, November 10)

Kohima, November 10 (TYO): Kohima kübok Kohima Local Ground nung 22 buba Classic Cup football asayamong ‘Dream Courage to Achieve’ omen nung ajemdaker tanü, Brehostibar nü tenzükogo.
Asayamong nung tongti tesemdanger jaokba yimya melenshia, tayonger, Classic Club Kohima (CCK)-i tongti tesemdanger mejaoki, Kohima Press Club nung Tir, Xavier Rutsa jaoka, pa nem asayartem den ajurutepdaktsüba sülen asayamong tenzükdakja liasü.
Asayamong tetenzükba asaya nung Elite Football Club teloki goal 1-0 agi PWD Youth Organization (PWDYO) telok madak takok angu.
Tanü asaya tenzüker minute 14 buba nung PWDYO asayar, Alaomer-i danger zone nung teka agi ball dak kongshia, penalty menazükba sülen Khangatar-i penalty ball takok ngua metsüokja, par Elite telok nem takok ngudaktsü.
Tan asayamong nung ajak agi telok 31 tashi toktepa shilem agitsü renema lir.
Iba asayamong ya tan November ita 30 nü tembangtsü aser asayamong nung champions teloki takok marok o kulikaket den senpet sen lakh 1.5 aser tanabuba jenjang angur telokia tanabuba jenjang takok marok o kulikaket den senpet sen 80,000 agizüktsü.
November 11 nü asaya yamai alitsü:
1. Crony FC vs Lerie Youth Football Club @ 10:00am
2. Tyrants FC vs Keziekie FC @ 11:30 am
3. Upper Chandmari YO vs Addax FC @ 1:00pm.