22buba Delhi Book Fair sentong tenzükogo

New Delhi, August 27 (Agencies) : 22buba Delhi Book Fair, linük yimtiba nung Honibarnü nungi tenzükogo aser iba sentong nung India tesem balala aser bendanglen nungi company tulu 250 dak temai shilem agidar.
Book Fair ya India Trade Promotion Organisation (ITPO) aser Federation of Indian Publishers (FIP) na senteper Hall 8 nungi 12A tashi nung Pragati Maidan nung September 4, 2016 tashi ayonga akarba lir.
Iba sentong nung fiction aser non-fiction kakettem, academic kakettem aser iba den külemi children’s literature, classics aser digital bushisüngdangba kakettem dena kaket tapu aika sayatsü.
Iba fair-i arurtemi kaket tapu balala mela mela ngutettsü atema mobile app kar lapokja lir.
Tesem külenbo linük sentong balala Make in India, Swachh Bharat Abhiyan, Digital India, Skill India aser Startup India atema ‘Selfie Stations’ lapokja lir.
Fair-i arurtem kanga temulung asütsüa kaket azüngba, telok balalai ken atenba, tetoktepba balala, film sayuba, quiz, jilushi aser otsü shitepba sentongtem ayonga agidar.
Ano senden aser shisatokden dak sentakba sentong, kaket atema olemtepba aser kaket zülurtem den ajurutepba sentongtema ayonga akatsü.
Iba sentong nung adentsü arurtem Gate number 1, 7 aser 10 len nungi aittsü. Iba Fair ya anepdang 10:00 ako nungi 8:00 ako tashi lapoka alitsü.