23 Impur A/C nungi NPF candidate Dr. Imtiwapang-i election aitsü sangdongogo

Mokokchung, Tsüklai 12 (TYO): 23 Impur Assembly Constituency nungi Naga People’s Front (NPF) candidate aser tang NLA Speaker, Dr. Imtiwapang Aier-i Tentonü (Hombarnü) par Süngratsü yimdak pa election-i aitsü asoshi sangdongba sentong ka Süngratsü Salang nung agia liasü.
Pai tanü iba sentong nung jembidang, Süngratsü yimden yimsüsürtemi anir lanurtemi ‘clean election’ dak ajemdaker election nung shilem agitsü lemtetba asoshi pelaba o ka lemsatepa liasü.
Küm pungu menden nung alidang, nübur mulung mesütsüi arur alitsü akok, aji saka, akok tashi state senpong nungibo kecha mapa balaka meinyaktet nung centre nungi mapatong kar bener arua merangogo aser tang itemji teinyakdak lir, ta pai ashi.
Paisa adoker inyaktsü tebilemba kar lemsatepdang, tetsür jenjang ajungkettsütsü aser lanur mapa mungui aliba tebilemtsü atema mapatong kar bener arua inyaktsü, ta ashi. Mapa inyaktsü maongka bushiba denji ano private entrepreneurship aser pei sasa mapa inyaka tepok sünga litettsü asoshi maparen kar inyaktsü tebilemba lir, ta paisa shisem.
Tang koba alima tobur jungdaktsüba den külemi tzü mopung kümzüka aser wazüka ayutsü nükla nung ‘Greener Asetkong’ mapatong taoba küm ishika jakdang nungi inyaka arudaki, iba mapaji ano maneni inyaka aotsü, ta paisa metetdaktsü.
Mokokchung district kübok Assembly Constituency balala nung NPF ticket ya takoktsü candidate dang shima agütsü asünung, takok tajung angutsü asoshi taoba mapang yaritepa aruba ama ano maneni yaridaktsünür, ta paisa mepishia ashi.
Tanü iba sentong nung Süngratsü village council chairman M. Taka Longchar, NPF Mokokchung Division tir Moasangba Jamir, Yisemyong Adhoc town council vice chairman M. Imrong Ozüküm aser tangatemi mapang tatsütsü agia jembia liasü.