24buba NSF Martyrs’ Trophy Sep 14 nungi asayatsü

Kohima, Chiteni/July 29 (TYO): Angami Students’ Union (ASU)-i Hombarnü sangdong ka ajanga 24buba NSF Martyrs Memorial Trophy September 14 nungi October 5 nü tashi IG Stadium Kohima nung asayatsü ta metetdaktsüogo.

Osangbenertem den sensaksemba mapang asayamung Organising Committee Convenor Vizokho Zashümo den co-convenor Neitsietuo Norbert Mere, ASU tir Khriesamhalie David Mere nunger iba osang ya ASU executive züngsemtem matsüngdang parnok indang office nung metetdakja liasü.

Zashümo-i ashiba agi, iba asayamung atema senpet sen lakh 1 agi timba kümja sen lakh 7.5 kümogo, kong asayamung akokba tesem nem senpet sen lakh 3 aser tatongdakba nem senpet sen lakh 1.8 agütsütsü aliba densema lir. Senpet den takok marok aser kuli kaket dena agütsütsü.

Kasa mapang nung semifinal nung tamakok anguba team ana nem senpet sen 40,000 aser quarter-finalists nung tamakok anguba team tem nem senpet sen 25,000 agütsütsü, ta ketdangsürtemi metetdaktsü.

Jurila sempet tem rongnung best midfielder, best defender, best goalkeeper, aser highest scorer densema lir aser parnok ajak nem senpet sen 10,000 agütsütsü, aser Man of the tournament nem senpet sen 50,000 agütsütsü.

Zashümo-isa, iba asayamung atema senpet ajungkettsüogo, kechiyong iba asayamung ya silver jubilee atema renemshiba asayamung ka asütsü, ta ashi.

Asayamung nung shilem agitsü jangraba team temi August 1 nü nungi tenzüka ASU Office, Sports World main town Kohima, Sports Paradise Keziekie, Royal Enfield High School junction, Falcon Corner Medziphema, G Sports Chumoukedima aser Kiran Sports & Stationeries Dimapur nungi form meshitettsü, ta metetdaktsüogo.

Asayamung atema taah team shia sen 7000 agitsü aser form sen 200 agi alizüktettsü. Form benoktsüba atema tatembangbuba anogoji September 7 nü asütsü.

Kasa mapang nung asayamung ayongertemisa asayamung mapang ground achaayangtsü asoshi organizing committee mesüra ASU office den tongteprateptettsü, ta metetdaktsüogo.